Туркистон расман “Ҳунармандлар шаҳри” деб тан олинди
TÚRKІSTAN. Kazinform - Халқаро эътироф минтақадаги амалий санъат усталари учун ўзига хос истиқболларни очади, деб хабар беради Kazinform агентлиги мухбири.
Бу эътирофнинг тарихи февраль ойида турли мамлакатлар – Ҳиндистон, Туркия, Жануби-Шарқий Осиё давлатларидан экспертлар делегацияси Туркистонга расмий ташриф билан келганидан бошланган. Меҳмонлар орасида Жаҳон ҳунармандчилик кенгашининг Осиё-Тинч океани минтақаси бўйича вице-президенти ҳам бор эди. Учрашув якунлари бўйича “Халқаро ҳунармандлар шаҳри” мақомини олиш каби улкан мақсад кўзда тутилди. Тегишли ариза топширилди.
Бугун бу орзу ушалди: Туркистон ҳунармандчилик маркази мақомини тасдиқловчи сертификат олди. Вилоят марказининг бой маданий мероси ва салоҳиятини баҳолаган нуфузли халқаро World Craft Council ташкилоти шундай қарор қабул қилди.
Энди Туркистон ҳунармандлари ёрдамга умид қилишлари мумкин. "Махсус мақом" тўғрисидаги қонунга кўра, давлат ҳунармандлар харажатларининг 25 фоизини қоплайди.
— Туркистон маданиятида кулолчилик алоҳида ўрин тутади. Маҳаллий ҳунармандларнинг маҳсулотлари қадимдан минтақанинг ўзига хос белгиси бўлиб келган. Улар ўзларининг гўзаллиги, ноёб нақшлари ва бенуқсон сифати билан ҳайратга солган. Шаҳарда ҳунармандчиликни янада ривожлантириш мақсадида “Ҳунармандчилик маркази” ташкил этиш режалаштирилган. Бу ерда усталар ишлаб, ёшларга таълим бериб, ўз тажрибалари билан ўртоқлашади, — дейилади Туркистон вилояти ҳокимлиги матбуот хизмати хабарида.
Эслатиб ўтамиз, аввалроқ Туркистон “Халқаро ҳунармандлар шаҳри” мақомини олиши ҳақида хабар берган эдик.
Шунингдек, ҚР Президенти “Туркистон шаҳрининг алоҳида мақоми тўғрисида”ги қонунни имзолади.
