Тошкентда COVID-19 билан касалланиш даражаси ошгани қайд этилди
1-сонли Зангиота кўп тармоқли шифохонаси директори ўринбосари Олимжон Исҳоқов бу ҳақда «Ўзбекистон 24» телеканалига берган изоҳида айтиб ўтди.
«Бизнинг касалхонамиз 2 минг ўринга мўлжалланган. Аммо ҳозирда бу ерда 2550 бемор даволанмоқда. Коронавирусга чалинган беморларнинг сони, айниқса ҳомиладор аёллар ва болалар орасида кескин ошди. Блокларда кўплаб беморлар бўлганлиги сабабли, биз болаларни катталар бўлимларига жойлаштиришга мажбурмиз. Бу ҳолат эмлашсиз муаммони ҳал қилиб бўлмаслигини кўрсатмоқда», - деди шифокор.
Унинг таъкидлашича, кунига 350 га яқин одам касалхонага ётқизилади. Касалхонада ўринлар бандлиги сабабли беморларни қабул қилиш тўхтатилди.
Худди шундай ҳолат 2-сонли Зангиота кўп тармоқли шифохонасида ҳам такрорланмоқда, у ерда ўтган кунги ҳолатга кўра, 2 мингта ўриндан фақат 300 та ўрин бўшдир, бу ҳам касалликнинг ҳозирги ўсишини ҳисобга олинса, бир ёки икки кун ичида тўлади деган гап.
Эслатиб ўтамиз, эпидемиологик вазиятнинг оғирлашиши туфайли 28 июндан бошлаб Ўзбекистонда карантин чоралари кучайтирилди. Ўзбекистон пойтахти икки ҳафталик карантинга ёпилди. Ўринлар ҳажмини кенгайтириш учун Тошкентда 2000 ўринли заҳирага эга коронавирус марказлари ташкил қилинмоқда.
Муаллиф: Мадибек Жанибеков
