«Таза Қазақстан» акцияси 5,83 миллиондан ортиқ одамни бирлаштирди
ASTANA. Kazinform - Давлат раҳбари ташаббуси билан апрель ойида бошланган «Таза Қазақстан» республика экологик акцияси мамлакатнинг барча ҳудудларини қамраб олди, деб хабар беради Kazinform агентлиги Primeminister.kzга таяниб.
Жорий йилнинг март-ноябрь ойларигача мазкур акция 5 миллион 830 мингдан ортиқ кишини бирлаштирди, бу эса мамлакат аҳолисининг салмоқли қисмини ташкил этади. Тадбирлар доирасида 1 миллион 159 минг тоннадан ортиқ чиқинди йиғилиб, 1 миллион 609 минг тупдан ортиқ дарахт кўчатлари ўтқазилди. Давлат тузилмалари даражасида ҳам, жамоатчилик, жумладан, кўнгиллилар ва хусусий ташкилотлар ўртасида ҳам фаол иш олиб борилди.
Ноқонуний ахлатхоналар ва ҳаво ифлосланишига қарши кураш
«Таза Қазақстан» акцияси доирасида рухсат этилмаган ахлатхоналарни аниқлаш бўйича рейдлар ўтказилди. Ҳудудий экология бошқармалари ва маҳаллий ҳокимликлар билан ҳамкорликда кўплаб ахлатхоналар бартараф этилди.
“Тоза ҳаво” рейдлари давомида 482 та автомашина текширилиб, 105 та экологик меъёрлар бузилиши ҳолатлари аниқланди. 96 нафар ҳайдовчига нисбатан жарима ва огоҳлантириш тарзидаги маъмурий чоралар қўлланилди.
Экология учун рақамли қўллаб-қувватлаш
Фуқароларга экологик муаммолар ҳақида хабар бериш ва уларни ҳал этишда иштирок этиш имкониятини берувчи @TazaQazBot рақамли платформаси яратилгани лойиҳанинг алоҳида ютуғи бўлди. Бир йил давомида чатбот орқали 7929 та ариза берилди. Шундан 7061 та ариза кўриб чиқилган, 168 та ариза кўриб чиқилмоқда, 23 та ариза жараёнда, 674 та ариза рад этилган.
Энг кўп мурожаат қилинганлар: ҳудудларни тозалаш – 2142 та, маиший чиқиндиларни олиб чиқиш – 668 та, кўчаларни ободонлаштириш – 648 та, йўлларни таъмирлаш – 595 та мурожаат.
Ҳудудлар орасида Алмати 2014 та ариза билан етакчилик қилмоқда. Кейинги ўринда Астана – 1587 та ариза. 757 та ариза билан Қарағанди вилояти учинчи ўринда.
Аҳолининг экологик маданиятини ривожлантириш концепцияси
Эришилган натижаларни мустаҳкамлаш ва узоқ муддатли истиқболда экологик маданиятни шакллантириш мақсадида “2024–2029 йилларда аҳолининг экологик маданиятини ривожлантириш концепцияси” тасдиқланди. Ушбу ҳужжат экологик сиёсатнинг асосий йўналишларини белгилайди.
Концепциянинг устувор йўналишларидан бири ёшларни экологик лойиҳаларга жалб этиш эди. Жорий йилда ободонлаштириш ва кўкаламзорлаштириш тадбирларида 90 мингдан ортиқ кўнгилли иштирок этди.
Концепцияда фуқароларнинг фаол иштирок этиши учун шарт-шароит яратиш ҳам асосий йўналиш ҳисобланади. Ўз самарадорлигини исботлаган @TazaQazBot каби рақамли платформаларни ривожлантиришга алоҳида эътибор қаратилмоқда.
Келгуси йилда ҳудудларни ободонлаштириш ва кўкаламзорлаштириш бўйича кенг кўламли республика акцияларини ўтказиш режалаштирилган.
Эслатиб ўтамиз, июнь ойида Президент Қасим-Жомарт Тоқаевнинг «Таза Қазақстан» ташаббуси доирасида Jibek Joly телеканали “Таза қала” кенг кўламли телелойиҳасини ишга туширган эди. Дастурни суратга олиш гуруҳи Қозоғистоннинг катта-кичик шаҳарларида бўлиб, уларнинг тозалиги, гўзаллиги ҳақида кўрсатувлар тайёрлади.
