Шимолий Корея илк марта Жанубий Корея билан денгиз чегараси орқали ракета учирди
Жанубий Корея президенти воқеани «аслида бу босқинчилик» деб атади.
Шимолий Корея томонидан учирилган қисқа масофали баллистик ракета Жанубий Кореянинг Сокчхо шаҳридан тахминан 60 км узоқликда, яриморолнинг шарқий соҳилидаги демаркация чизиғи яқинида денгизга қулади.
Бунга жавобан Жанубий Корея денгиз чегараси орқали денгизга учта ракета учирди.
Жанубий Корея президенти Юн Сок Ёль денгиз чегараси орқали ракета учирилишига КХДР томонидан «аслида бу ҳудудни эгаллаб олишга уриниш» дея баҳо берди.
Жанубий Корея ҳарбийларига кўра, шимолий кореяликлар чоршанба куни эрталаб камида 10 та ракета учирган.
Корея Республикаси Бош штаби Жанубий Корея ҳарбийлари «КХДРнинг бундай провокацияларига тоқат қилмаслигини ҳамда Жанубий Корея ва АҚШ ўртасидаги яқин ҳамкорлик доирасида қатъий ва жиддий жавоб беришини» маълум қилди.
Жанубий Корея президенти ва Япония бош вазири КХДР томонидан яқинда учирилган ракета юзасидан ўз мамлакатларида миллий хавфсизлик кенгашларини йиғишди.
Дарҳақиқат, денгиз чегарасидан учиб ўтган ракета ундан 25 километр, Сукчхо шаҳридан 57 километр узоқликда қулаган.
Бир кун аввал Пхеньян Жанубий Корея ва Қўшма Штатлардан шу ҳафта бўлиб ўтадиган қўшма ҳарбий машғулотларни тўхтатишни талаб қилиб, агар рад жавобини берса, «кучли» чоралар кўриш билан таҳдид қилган эди.
Ўтган ойда КХДР АҚШ, Жанубий Корея ва Япония ўртасидаги қўшма ҳарбий машғулотларга жавобан бир қатор учиришларни бошлади.
Фото: YONHAP/REUTERS
