ШҲТга аъзо давлатларнинг фавқулодда вазиятлар бўйича идоралари раҳбарларининг XI йиғилиши бўлиб ўтди

ASTANА. Кazinform – 20 апрель куни Деҳли шаҳрида (Ҳиндистон Республикаси) Ҳиндистон томони раислигида ШҲТга аъзо давлатлар фавқулодда вазиятларнинг олдини олиш ва бартараф этиш билан шуғулланувчи идоралари раҳбарларининг XI йиғилиши бўлиб ўтди, деб хабар беради Кazinform Қозоғистон Республикаси Фавқулодда вазиятлар вазирлиги матбуот хизматига таяниб.

Мазкур Йиғилиш ШҲТга аъзо давлатлар ўртасида фавқулодда вазиятларнинг олдини олиш ва уларни бартараф этиш соҳасидаги ҳамкорликнинг асосий механизмларидан бири ҳисобланади.

Тадбирда Ҳиндистон, Хитой, Қирғизистон, Россия, Тожикистон, Ўзбекистон фавқулодда вазиятлар департаментлари раҳбарлари ва вакиллари, шунингдек, ШҲТ Котибияти вакиллари иштирок этди.

Қозоғистон томонидан Фавқулодда вазиятлар вазири Юрий Ильин ва Халқаро ҳамкорлик департаменти директори Армаис Григорян иштирок этди.

Йиғилишда делегациялар раҳбарлари ўтган давр мобайнида ШҲТга аъзо давлатларда содир бўлган энг кенг кўламли фавқулодда вазиятлар ва улардан олинган сабоқлар бўйича тақдимотлар қилдилар ҳамда ШҲТ доирасида фавқулодда вазиятларнинг олдини олиш ва уларни бартараф этиш соҳасидаги ҳамкорликни янада ривожлантириш истиқболлари юзасидан фикр алмашдилар.

Учрашув якунлари бўйича томонлар тайёр бўлиш, фавқулодда вазиятларда ҳаракат қилиш ва табиий ҳамда техноген офатлар натижасида юзага келадиган фавқулодда вазиятлар оқибатларини биргаликда юмшатиш соҳасида ҳамкорликни янада кучайтириш зарурлиги тўғрисида қўшма қарорлар қабул қилди.

Тадбир доирасида Қозоғистон Республикаси Фавқулодда вазиятлар вазирлиги раҳбари Юрий Ильин Ҳиндистон Ички ишлар вазири Амит Шоҳ ва Ўзбекистон Республикаси Фавқулодда вазиятлар вазири Абдулла Қўлдошев билан икки томонлама учрашувлар ўтказди.

Қозоғистон Республикаси Фавқулодда вазиятлар вазири Юрий Ильин ўз нутқида кенг кўламли офатлар ва катаклизмлар билан боғлиқ юзага келиши мумкин бўлган таҳдид ва хатарларнинг олдини олиш бўйича ҳамкорликда иш олиб бориш муҳимлигини таъкидлади ҳамда жамият ҳаётининг долзарб масалалари юзасидан фикр алмашилди.

Учрашув чоғида Қозоғистон ва Ўзбекистон Фавқулодда вазиятлар вазирлиги раҳбарлари табиий ва техноген хавф юзага келган тақдирда икки давлат идораларининг ўзаро ҳамкорлиги алгоритмини аниқлаштириш мақсадида чегарадош ҳудудлар бошқармалари билан ўзаро ҳамкорлик режасини имзоладилар.

Фото: t.me/qr_tjm