Президент «Байтерек» холдинги бошқаруви раисини қабул қилди

ASTANА. Кazinform – Давлат раҳбари «Байтерек» миллий бошқарувчи холдинги» АЖ бошқаруви раиси Қанат Шарлапаевни қабул қилди, дея хабар беради Кazinform Ақорда расмий сайтига таяниб.

Қасим-Жомарт Тоқаевга «Байтерек» холдингининг 2023 йилнинг биринчи ярмидаги фаолияти якунлари, жумладан, тадбиркорларни, агросаноат комплексини қўллаб-қувватлаш ва аҳолини уй-жой билан таъминлаш бўйича ташаббусларни амалга оширишнинг бориши ҳақида маълумот берилди.

Президентга тақдим этилган маълумотларга кўра, йирик тадбиркорлик субъектларини молиялаштириш ҳажми 114,4 млрд тенгени ташкил этади. Холдинг «Даму» жамғармаси орқали кичик ва ўрта бизнесни ривожлантиришни фаол қўллаб-қувватламоқда. Жамғарма 15 мингдан ортиқ тадбиркорни қўллаб-қувватлади.

Йил бошидан буён «Оtbasy Bank» 29 минг оилага уй-жой олишда ёрдам берди. Банк шунингдек, уй-жой ижарасини субсидиялаш дастурида фаол иштирок этади. Дастур доирасида I ва II гуруҳ ногиронлари, ногирон болаларни тарбиялаётган оилалар, етим болалар, кўп болали оилаларга давлат томонидан беғараз ёрдам кўрсатилди. Йилнинг биринчи ярмида мазкур йўналишда 9 мингдан ортиқ мурожаат маъқулланди.

Шунингдек, йил бошидан буён «Аграр кредит корпорацияси» акциядорлик жамияти орқали 271 миллиард тенгедан ортиқ маблағ ажратилиб, 9 мингга яқин фермер қўллаб-қувватлангани маълум қилинди. Жорий йилда 3,5 миллион гектар майдонга экинлар экилди. Бу мамлакатдаги барча экин майдонларининг 15 фоизини ташкил қилади. Озиқ-овқат хавфсизлигини мустаҳкамлаш ва импортга қарамликни камайтириш мақсадида қишлоқ хўжалигидаги инвестиция лойиҳаларини кредитлаш учун 131 миллиард тенгедан ортиқ маблағ йўналтирилди. Қишлоқ хўжалигини молиялаштиришнинг 70 фоиздан ортиғи «Аграр кредит корпорацияси» АЖ ва «ҚазАгроФинанc» АЖга тегишли.

Учрашув якунида Президент ишбилармонлик муҳитини яхшилаш, ижтимоий уй-жой сиёсатини такомиллаштиришга қаратилган аниқ топшириқлар берди.