Покистон ва Ҳиндистон ўт очишни тўхтатиш муддатини узайтирди

ASTANA. Kazinform — Покистон ва Ҳиндистон пайшанба куни музокара ўтказди ва амалдаги ўт очишни тўхтатиш режимини 18 майга қадар узайтиришга келишиб олди.Бу ҳақда Покистон бош вазири ўринбосари, ташқи ишлар вазири Исҳоқ Дар маълум қилди, дея хабар беради Кazinform агентлиги Xinhua агентлигига таяниб.

Парламентда сўзлаган нутқида у пайшанба куни икки давлат ҳарбийлари бир-бирлари билан алоқага чиққанини ва ўт очишни тўхтатиш режимини узайтиришга қарор қилганини, сўнгра сиёсий мулоқотга ўтишни айтди.

— 10 майда тузилган дастлабки ўт очишни тўхтатиш келишуви 12 майгача амалда бўлган. Кейин у 14 майга, энди эса 18 майга қадар узайтирилди, — деди Исҳоқ Дар парламентарийларга.

Унинг қўшимча қилишича, ҳозиргача ҳарбий даражадаги музокаралар ўт очишни тўхтатиш режимини сақлашда муҳим рол ўйнаган ва кенг қамровли сиёсий музокаралар 18 майдан кейин бошланади.

— Ҳиндистон билан ҳар томонлама ва натижага қаратилган музокаралар олиб борилади. Мақсад кимнингдир устунлигини тан олиш эмас, балки муаммоларни тенглик асосида ҳал қилиш, — дея таъкидлади Покистон ташқи ишлар вазири.

7 май куни эрта тонгда Ҳиндистон назоратидаги Кашмирдаги Пахалгам шаҳрида ўтган ой қуролли ҳужум уюштирган ва номаълум жангарилар 26 нафар тинч аҳолини ўлдирганидан сўнг, Ҳиндистон Покистондаги бир қанча нишонларга ҳаво ҳужумларини амалга оширгач, икки давлат ўртасидаги кескинлик кучайди.

Бир неча кун давом этган шиддатли жанглардан сўнг томонлар 10 май куни ўт очишни тўхтатишга келишиб олдилар, кейинчалик бу келишув босқичма-босқич узайтирилди.

Эслатиб ўтамиз, аввалроқ АҚШ давлат котиби Покистонга Ҳиндистон билан музокараларда ёрдам таклиф қилгани ҳақида хабар берган эдик.