Париж-2024: Олимпиада совриндорлари Чемпионлар боғида тақдирланади
ASTANА. Кazinform - Франция пойтахти Париж шаҳрида бўлиб ўтадиган XXXIII ёзги Олимпия ўйинлари ғолиб ва совриндорларини тақдирлаш учун махсус жой эълон қилинди.
PARIS2024 Kazakhstan Телеграм каналида таъкидланганишича, Эйфель минораси этагидаги Трокадерода жойлашган Чемпионлар боғи Олимпия ўйинлари ғолиблари ва медаль совриндорларининг ютуқларини нишонлашга бағишланган майдон бўлади. Боғ бутун дунёдан спорт ишқибозлари учрашадиган жойга айланади.
"Ёзги ўйинлар тарихида биринчи марта барча медал совриндорлари минглаб мухлислар билан учрашишга таклиф қилинади. Трокадеро - Парижнинг қоқ марказидаги ажойиб жой, ҳамма учун очиқ. Ҳар куни Чемпионлар боғида ғолиблар шарафланади. Улар парадда иштирок этиб, йиғилган омма билан бирга очиқ осмон остида ўзларининг зафарли лаҳзалари акс этган видеоклипларни томоша қилишади”, — дейилади хабарда.
Бундан ташқари, дастурда санъаткорларнинг чиқишлари, маданий тадбирлар ўрин олган. Улар Чемпионлар боғини шунчаки спорт байрами ўтказиладиган жойга эмас, балки тўлақонли, универсал кўнгилочар майдонга айлантирмоқчи.
Эслатиб ўтамиз, айни дамда тўрт йиллик мусобақага йўлланмани қўлга киритган қозоғистонлик спортчилар сўнгги машғулотларни ўтказишмоқда. Қозоғистон терма жамоаси спортнинг 25 тури бўйича Олимпия ўйинларига 80 та йўлланмани қўлга киритди. Хусусан, бокс, дзюдо, гимнастика, енгил атлетика, байдарка ва каноэда эшкак эшиш, ўқ отиш, қиличбозлик, юнон-рум кураши, эркин кураш, камондан отиш, стендда отиш, теннис, велошоссе, сузиш, замонавий бешкураш, таэквондо, велотрек, батут гимнастикаси, бадминтон, академик эшкак эшиш, бадиий гимнастика, триатлон, стол тенниси, қояга кўтарилиш ва брейкинг бўйича Олимпия ўйинларида иштирок этади.
Франция пойтахти Париж шаҳрида бўлиб ўтадиган XXXIII ёзги Олимпия ўйинлари 26 июлдан 11 августгача бўлиб ўтади. Ўйинларда 205 давлатдан 10 500 нафар спортчи иштирок этиши режалаштирилган. Унда 32 спорт туридан 329 та медаллар жамланмаси ўйналади.
