Оффшор юань тенденцияси пасайиб бормоқда

ASTANA. Kazinform – АҚШ ва Хитой ўртасида авж олган савдо уруши фонида Пекин миллий валюта устидан назоратни юмшатгани сабабли, оффшор юань курси тарихий энг паст даражага тушди.

Lianhe Zaobao нашрининг хабар беришича, 8 апрель куни Нью-Йорк савдо сессиясида оффшор юань долларга нисбатан бир лаҳзада 0,9 фоизга пасайиб, 1 АҚШ доллари 7,4141 юанга баҳоланган. Шу тариқа, реал валюта курси бўйича рекорд даражадаги энг паст кўрсаткич янгиланди.

Ўша куни Хитой Халқ банки юаньнинг расмий ўртача курсини 1 АҚШ долларига 7,2038 юань даражасида белгилади – бу 2023 йил сентябридан бери энг заиф кўрсаткичдир.

Шундай қилиб, юаннинг расмий курси Трамп Оқ уйга қайтганидан бери биринчи марта 7,20 дан пастга тушди. Юаннинг ички бозордаги курси ҳам 2023 йил сентябрь ойидан бери энг паст даражага етди.

“Бизнинг тахминимизча, яқин вақт ичида юань курси тезда қадрсизланади. Хитой ҳукумати ўртача курс орқали алмашув курсига кўпроқ мослашувчанлик бериш ниятида эканини билдирмоқда”, – дейди Wells Fargo банкининг макростратегия ва ривожланаётган бозорлар бўлими директори Аруп Чаттержи.

Унинг сўзларига кўра, бу назорат остида бўладиган доимий девальвация жараёни бўлади. Шу тариқа оффшор юань курси 1:7,50 ёки ундан ҳам паст даражага тушиб кетиши мумкин.

JPMorgan банкининг валюта таҳлилчиси Тиффани Вангнинг сўзларига кўра, Хитой Халқ банки навбатдаги мудофаа тизимини қайси даражада ташкил этиши ҳозирча номаълум. Аммо чегара аввалгидан юқори бўлади. Унинг фикрича, юань курси 7,40 гача тушиши мумкин.