Минглаб юк машиналари Европа Иттифоқи чегарасида турибди

NUR-SULTAN. Kazinform –Сўнгги кунларда Польша-Беларусь чегарасида Россия ва Беларусь юк машиналарининг узун навбати пайдо бўлди. Бунга икки давлатнинг ҳайдовчиларга Европа Иттифоқида траспорт ҳайдашини тақиқловчи янги санкциялар пакети кучга киргунга қадар кетишга урингани сабаб бўлди, деб хабар беради Kazinform euronewsга таяниб.

Шанба куни «Корощин» назорат-ўтказиш пунктида тирбандлик 80 км давом этган, айрим юк машиналари чегарада 30 соатдан ортиқ тўхтаб қолган.

Бундан ташқари, Латвия ва Литва чегараларида юк машиналарининг узун навбатлари юзага келган. Бироқ, Литва ҳукумати белгиланган муддатдан кейин тиқилиб қолган юк машиналарининг ўтишига рухсат беришини айтди.

Апрел ойи бошида Европа Иттифоқи Россияга қарши бешинчи санкциялар пакетини тасдиқлаган эди. Хусусан, Россия ва Беларусь транспорт ташувчиларининг Европа Иттифоқига кириши тақиқланган. Европа Иттифоқида фақат озиқ-овқат, дори-дармон, почта ва энергия воситаларига рухсат берилган.