Мамлакатнинг барча ҳудудларидан Миллий қурултой аъзолари Астанада йиғилди
ASTANА. Кazinform — ҚР Давлат маслаҳатчиси Ерлан Қарин ҳудудлардаги жамоат кенгашлари таркибига кирувчи Миллий қурултой аъзолари билан учрашув ўтказди.
Учрашувда Ерлан Қарин давлат раҳбари томонидан Миллий қурултой фаолияти доирасида илгари сурилган муҳим ташаббусларни ҳаётга татбиқ этиш масалаларига тўхталди.
Улар орасида хотин-қизлар ва болалар ҳуқуқларини ҳимоя қилиш, вейпларни тақиқлаш, лудомания, вандализмга қарши курашиш ва бошқа масалаларга оид қатор қонунлар қабул қилинганини алоҳида қайд этиш мумкин.
Шу билан бирга, Давлат маслаҳатчиси Президент Қасим-Жомарт Тоқаев топшириғига асосан Ягона тарбия дастури ишлаб чиқилиб, мактабларда жорий этилишини таъкидлади.
Ерлан Қарин, шунингдек, ҳудудларда фуқаролик институтларини, айниқса фуқаролик секторини ривожлантириш муҳимлигига эътибор қаратди. Бунда жамоатчилик кенгашлари алоҳида ўрин тутади.
Ўз навбатида, Миллий қурултойнинг ҳудудлардан ташриф буюрган аъзолари ҳудудларни ривожлантириш билан боғлиқ долзарб масалаларга эътибор қаратдилар. Шу билан бирга, маҳаллий аҳоли ва жамиятдаги гуруҳлар билан ўзаро муносабатларни ўрнатиш усуллари ҳақида ўз фикрларини билдирди.
Бундан ташқари, Миллий қурултой аъзолари фикр алмашиш чоғида Давлат раҳбарининг Қозоғистон халқига Мурожаатномасида қайд этилган ташаббусларни қўллаб-қувватлашини билдирди.
Учрашув якунида Давлат маслаҳатчиси келгусида Миллий қурултой аъзолари билан бир қатор учрашувлар ўтказилишини маълум қилди.
