Ливерпульдаги клиника яқинида портлаш: 3 киши терроризмда гумонланиб ҳибсга олинди

LIVERPOOL. Kazinform - Буюк Британиянинг Ливерпуль шаҳрида Европанинг энг йирик акушерлик ва гинекология клиникаси яқинида автомашинада портлаш содир бўлди, натижада бир киши ҳалок бўлди. Британия полицияси воқеа юзасидан террорчиликка алоқадорликда гумон қилинаётган уч киши ҳибсга олинганини маълум қилди, деб хабар беради Kazinform BBCга таяниб.

Тахминларга кўра, портлаш вақтида марҳум таксида бўлган. Aвтомобиль ҳайдовчиси ҳам жароҳат олган, у касалхонага ётқизилган, аҳволи барқарор.

Ҳуқуқ-тартибот идоралари жабрланувчининг исм-шарифини, шунингдек, ҳибсга олинганларнинг исм-шарифлари ва ҳужумнинг тахминий сабабларини ҳозирча маълум қилмаган. Фақат маълум бўлишича, қўлга олинганларнинг уч нафари ҳам эркак бўлиб, улар 21, 29 ва 26 ёшда.

Терговчилар «портлаш сабабларининг барча мумкин бўлган версияларини кўриб чиқаётганини» айтишди.

«Ҳозирги босқичда, портлаш содир бўлишидан бироз олдин клиника яқинида тўхтаган такси бўлган деб ҳисоблаймиз», - дейилади полиция хабарида.

Воқеа якшанба куни эрталаб соат 11:00 атрофида юз берган. Маҳаллий ўт ўчириш бўлими бошлиғи Фил Карриганнинг сўзларига кўра, ўт ўчирувчилар етиб борганида, автомобиль бутунлай ёниб кетган. «Ходимларимиз ёнғинни тезда ўчиришди, бироқ бир киши ҳалок бўлди»,- деди у. - Ёнғин тўлиқ тарқалгунча машинадан яна бир киши тушди.«

Ливерпуль акушерлик ва гинекология клиникаси ҳар йили 50 000 га яқин беморни қабул қилади. Бу Европадаги энг йирик бундай муассаса.

Фото: Ижтимоий тармоқлардан олинган кадр.