ҚР Президенти ЕХҲТнинг амалдаги раисини қабул қилди
NUR-SULTAN. Кazinform - Қозоғистон Президенти ЕХҲТнинг амалдаги раиси, Польша Ташқи ишлар вазири Збигнев Рауни қабул қилди, дея хабар беради Ақорда матбуот хизмати.
Учрашувда Президент умумхалқ референдумига тайёргарлик кўрилаётгани ҳақида гапирди.
— Референдум мамлакатдаги жиддий сиёсий ўзгаришлар жараёнининг бошланишидир. Қозоғистонда демократияни ривожлантириш бўйича ишлар давом эттирилади, – деди Президент.
Қозоғистон Президенти Польша билан икки томонлама ҳамкорлик ҳақида гапирар экан, бу давлатни Марказий Европа минтақасидаги муҳим ҳамкор деб билишини айтди.
– 2021 йил якунига кўра ўзаро товар айирбошлаш ҳажми 12 фоизга ошиб, 760 миллион долларни ташкил этди. Ўзаро товар айирбошлаш ҳажмини ошириш учун бизда кенг имкониятлар мавжуд, – деди Қозоғистон раҳбари.
Европада хавфсизлик ва ҳамкорлик ташкилотининг амалдаги раиси Президент Қасим-Жомарт Тоқаев раҳнамолигида амалга оширилаётган кенг кўламли сиёсий ва иқтисодий ислоҳотларни юқори баҳолади.
— Назаримда, бўлажак референдум Конституцияга ўзгартиришлар киритиш, аҳолининг ижтимоий фаровонлигини ошириш, бозор ислоҳотларини илгари суриш борасидаги саъй-ҳаракатларингиз нуқтаи назаридан катта ютуқдир. Бўлажак референдум ижобий ўзгаришларга олиб келадиган сиёсий ирода белгисидир. Қайд этишни истардимки, мамлакатингизда амалга оширилаётган конституциявий ислоҳотлар демократия, эркинлик ва қонун устуворлиги тамойилларини мустаҳкамлашга қаратилган, – деди польшалик дипломат.
Збигнев Рау мамлакатдаги диний жамоалар ва фуқаролик жамияти вакиллари билан ўтказган учрашувлари ҳақида маълумот берди. У, шунингдек, миллатлараро ва конфессиялараро тотувликнинг қозоқ моделини юқори баҳолади ва Қасим-Жомарт Тоқаевга Қозоғистонда яшовчи поляк диаспорасини доимий қўллаб-қувватлагани учун миннатдорчилик билдирди.
