Қозоғистонда силлиқлаш шарлари ишлаб чиқарувчи завод қурилади
ASTANA. Kazinform – Корхона 2028 йилда Талдиқорған шаҳрида иш бошлаши режалаштирилган. Унинг ишлаб чиқариш қуввати йилига 150 минг тонна маҳсулотни ташкил этади.
Астанада KAZ Minerals ва Чилининг ME Elecmetal компанияси ўртасида оффтейк-шартномаси имзоланди.
Лойиҳанинг сармоявий қиймати қарийб 85 миллион АҚШ долларини ташкил этади. Бу ташаббус, ўз навбатида, 100 та янги иш ўрни яратиш, вилоят ишлаб чиқариш салоҳиятини юксалтиришга салмоқли ҳисса қўшиш, давлат бюджети даромадларини оширишга хизмат қилади.
Тоғ-кон саноатида силлиқлаш (майдалаш) шарларини ишлаб чиқариш катта аҳамиятга эга. KAZ Minerals ҳар йили 70 минг тонна маҳсулотдан фойдаланиш учун 100 миллион доллар сарфлайди. Қозоғистонда бундай сифатли шарлар йўқлиги сабабли компания силлиқлаш шарларини ишлаб чиқариш бўйича жаҳон етакчиси ME Elecmetal компанияси маҳсулотидан фойдаланади.
«KAZ Minerals Management» МЧЖ бошқаруви раиси Эльдар Мамедов ME Elecmetal компанияси билан ҳамкорлик янги имкониятларга йўл очишини таъкидлади.
“KAZ Minerals ҳар доим мамлакат раҳбариятининг саноат сиёсатига мос келадиган ишлаб чиқариш циклининг максимал самарадорлигига қаратилган энг яхши ечимларни жорий этишга интилади. Юқори сифатли майдалагичлардан фойдаланиш тоғ-кон комплексларининг унумдорлигига таъсир қилувчи асосий омил ҳисобланади. 2023 йилда биз турли етказиб берувчиларнинг маҳсулот намуналарини кенг қамровли синовдан ўтказдик, уларнинг хусусиятларини илгари ишлатилган материаллар билан таққосладик. Баҳолашнинг асосий мезонлари шарлар истеъмоли, майдаланган руданинг бир тоннасига энергия сарфи, шарни ажратиш туфайли ишлаб чиқаришнинг тўхтаб қолишини камайтириш ва, албатта, металл ишлаб чиқаришни кўпайтириш эди. ME Elecmetal маҳсулоти барча кўрсаткичлар бўйича энг яхши натижаларни берди”, – дейди раис.
Эльдар Мамедовнинг сўзларига кўра, оффтейк-шартномасини тасдиқлаш шунчаки бизнес келишуви эмас, балки Қозоғистоннинг тоғ-кон саноатини ривожлантириш ва унинг жаҳон бозорида рақобатбардошлигини оширишга қаратилган стратегик ҳамкорликдир. Корхона қурилиши сифатли маҳсулотга бўлган талабни қондириш билан бирга, маҳаллий ишлаб чиқаришни ривожлантириш, янги иш ўринлари яратиш, янги технологияларни ишга тушириш имконини бермоқда.
KAZ Minerals – бу Қозоғистондаги замонавий, кенг кўламли, арзон очиқ усулда қазиб олиш компанияси бўлиб, катта ривожланиш салоҳиятига эга. Гуруҳ Абай вилоятидаги Ақтоғай мис конида, Орлов конида ва фабрикасида, Павлодар вилоятидаги Бозшакўл конида, Шарқий Қозоғистон вилоятидаги иккита кон ва рудани қайта ишлаш комбинатида, Қирғизистондаги “Бозимчак” мис-олтин конида фаолият юритади.
