Қозоғистонда мактаб формаси олиб ташланиши мумкин. Деярли

ASTANA. Kazinform – Қозоғистон Таълим-маориф вазирлиги мактаб формасига яна бир ўзгартириш киритмоқчи. Унинг тартиби ва қоидалари вазирликнинг жамоатчилик муҳокамасига чиқарилган буйруғида ёзилган, деб хабар беради Kazinform мухбири.

Вазирлик таклифига кўра, эндиликда ўғил болалар кўйлак, тугмачали ёки тўқилган куртка, кардиган, поло кўйлак ва футболка кийишлари мумкин бўлади. Қишда эса трикотаж жилет ва водолазкага рухсат берилади. Қизларга ҳам шу талаб қўйилади. Бироқ, қишда уларга трикотаж жилет ва водолазкага қўшимча равишда сарафанлар кийиш тавсия этилади.

«Шу пайтгача бўлган ўғил болалар оқ кўйлак, қиз болалар оқ блузка кийиши кераклиги ҳақидаги қоида олиб ташланади. Бундан ташқари, мактаб формасининг асосий рангига мос келадиган галстук тақиш талаби ҳам олиб ташланади»

, — дейилади буйруқда.

Ҳужжатга кўра, таълим кенгашлари ота-оналарга мактаб формасини маҳаллий ишлаб чиқарувчилардан харид қилишни тавсия қилади. Бироқ, бу борада алоҳида ишлаб чиқарувчиларга устунлик берилишига йўл қўйилмайди. Янги қоида ота-оналарнинг ишлаб чиқарувчини танлаш ва мактаб формасини сотиб олишда мустақиллигини таъминлаш мақсадида киритилмоқда.

Фармонга кўра, мактаб формаси масалалари муҳокамасида болаларнинг ота-оналари ва бошқа қонуний вакиллари ҳамда мактабдаги масъул шахслар иштирок этадилар ва қарорлар қабул қиладилар.

Ҳужжат 15 ноябрга қадар очиқ муҳокамага чиқарилди.

Муаллиф: Алихан Асқар