Қозоғистонда қўшилган қиймат солиғини рақамли тенгеда тўлаш мумкин

ASTANА. Кazinform - Жорий йилнинг 7 октябридан экспорт билан шуғулланувчи тадбиркорлар рақамли тенгедан фойдаланган ҳолда қўшилган қиймат солиғини тўлаши мумкин. Бу янги жорий этилган пилот лойиҳа бўлиб, 2025 йил охиригача давом этади. Бу ҳақда Молия вазирлиги Давлат даромадлари қўмитаси аудит департаменти директори Қадир Исмағулов батафсил маълумот берди.

“Қўмитамиз Миллий банк билан биргаликда рақамли қўшилган қиймат солиғи бўйича пилот лойиҳасини жорий қилади. Мазкур лойиҳа Давлат раҳбарининг топшириғи доирасида амалга оширилмоқда. Мақсад - рақамли тенгедан фойдаланган ҳолда ҚҚСни қайтариш жараёнини такомиллаштириш ва соддалаштириш. Рақамли тенге - бу миллий валютамиздан фойдаланишнинг янги усули, бизда нақд ва нақд бўлмаган валюта мавжуд. Бу янгиликдан солиқ маъмуриятчилиги соҳасида ҳам фойдаланмоқчимиз. Шу йўл билан биз қўшилган қиймат солиғини текширувсиз қайтариш муддатини 55-75 кундан 15 кунгача қисқартиришни режалаштирганмиз”, — деди Қадир Исмағулов агентлик мухбири билан суҳбатда.

Унинг сўзларига кўра, рақамли тенгега ўтиш экспортчилар ва инвесторлар учун фойдалидир.

“Бунинг учун экспорт қилувчилар ўз маблағларини Миллий банкка рақамли тенгеда ўтказишлари керак ва уларга белги қўйилади. Барча харажатлар импорт қилинадиган товарларга қўшилган қиймат солиғига киритилади, лекин товар экспорт қилинаётганда қўшилган қиймат солиғи ҳисобланмайди, улар ўз маблағлари ҳисобидан тўлайдилар, шунинг учун экспорт қилувчилар ҚҚСни қайтариб оладилар. Умуман олганда, пилот лойиҳаси сармоядорларнинг қизиқишини оширади, экспорчилар ишини яхшилайди, яъни экспортчилар тўлаган қўшилган қиймат солиғини тезда қайтарса, уларнинг айланмаси ортади, иши яхшиланади”, - дейди у.