Қозоғистонда баҳорги дала ишлари учун 126 миллиард тенге имтиёзли кредит берилди
ASTANA. Kazinform - Қозоғистонда 907 та қишлоқ хўжалиги товар ишлаб чиқарувчилари 125,6 миллиард тенге миқдорида молиялаштирилди, деб хабар беради Kazinform ҚР Қишлоқ хўжалиги вазирлигига таяниб.
Вазирлик матбуот хизмати хабарига кўра, Қишлоқ хўжалиги вазири Айдарбек Сапаров “Байтерек” Миллий бошқарув холдинги акциядорлик жамияти раҳбарияти билан йиғилиш ўтказди, унда 2025 йилда баҳорги дала ва ўрим-йиғим ишларини муддатидан олдин молиялаштириш бўйича аризаларни қабул қилиш билан боғлиқ масалалар муҳокама қилинди. Ушбу мақсадлар учун 700 миллиард тенгегача маблағ ажратиш режалаштирилган, шундан 560 миллиард тенге бозор капитал манбалари ҳисобидан жалб қилинади.
— 2024 йил 29 ноябрдан “Аграр кредит корпорацияси” АЖ «Кең дала 2» дастури бўйича йиллик 5 фоизлик имтиёзли фоиз ставкаси билан молиялаштиришни очди. 1364 та қишлоқ хўжалиги товар ишлаб чиқарувчиларининг умумий суммаси қарийб 205,1 миллиард тенгелик аризалар фонди шакллантирилган бўлиб, шундан 1253 та қишлоқ хўжалиги товар ишлаб чиқарувчиларининг жами 195,5 миллиард тенгелик аризалари кўриб чиқиш учун қабул қилинган. 907 та қишлоқ хўжалиги товар ишлаб чиқарувчиларига 125,6 миллиард тенге берилди, — дейилади Қишлоқ хўжалиги матбуот хизмати хабарида.
Шунингдек, ҳамкорликни кенгайтириш, имтиёзли кредитлаш йўналишлари, аграр соҳага сармоя жалб этиш, агросаноат мажмуасининг устувор йўналишларида “АКК” АЖ маблағлари ҳисобидан амалга оширилаётган лойиҳалар, янги молиялаштириш механизмлари ва 2025 йилга мўлжалланган режалар муҳокама қилинди.
Эслатиб ўтамиз, ҚР Бош вазири ўтган йили қишлоқ хўжалиги соҳасига рекорд миқдорда маблағ ажратилганини маълум қилган эди.
