Қозоғистон ва Исроил ТИВ раҳбарлари телефон орқали мулоқот қилди
Қозоғистон Республикаси Бош вазири ўринбосари – Ташқи ишлар вазири Мурат Нуртилеу Исроил Давлати Ташқи ишлар вазири Эли Коэн билан телефон орқали мулоқот қилди, деб хабар беради Kazinform ҚР ТИВ матбуот хизматига таяниб.
Мулоқот чоғида томонлар савдо-иқтисодий, сармоявий ва маданий-гуманитар соҳалардаги икки томонлама муносабатларнинг изчил ривожланишини таъкидладилар.
Исроил Ташқи ишлар вазири Исроил ва Фаластиннинг ХАМАС ҳаракати ўртасидаги зиддият доирасида Яқин Шарқдаги мавжуд вазият билан таништирди.
М. Нуртилеу можаронинг кучайиши ва ҳарбий амалиёт зонасида вазиятнинг кескинлашувидан хавотир билдирди. Қозоғистон Республикаси Ташқи ишлар вазирлиги раҳбари Қозоғистоннинг ҳозирги можаро бўйича позициясини билдирди.
Қозоғистон вазири зиддиятли томонларни Яқин Шарқда тинчлик ва барқарорлик йўлларини топишга чақирди. Унинг таъкидлашича, бу муаммо бутун дунё ҳамжамиятига тегишли глобал аҳамиятга эга.
Шу нуқтаи назардан, қозоғистонлик дипломат Қозоғистон Республикаси Президенти Қасим-Жомарт Тоқаевнинг МДҲ саммитидаги баёнотига эътибор қаратди ва вазиятнинг кескинлашуви нафақат Яқин Шарқда, балки бутун дунёда жиддий оқибатларга олиб келиши мумкинлигини таъкидлади. Шу муносабат билан Қозоғистон Исроил-Фаластин можаросини тинч музокаралар ва дипломатик мулоқотлар йўли билан ҳал этиш тарафдоридир.
М. Нуртилеу исроиллик ҳамкасбига Қозоғистон фуқароларини Ғазо секторидан эвакуация қилишга ёрдам беришни сўраб, бу вазифа мамлакат учун биринчи навбатдаги вазифа эканини таъкидлади. У Э. Коэнга Қозоғистон фуқароларини тезроқ мамлакатга қайтариш бўйича Миср расмийлари билан олиб борилаётган ишлар ҳақида маълумот берди.
Вазир Э. Коэн ўз ҳамкасбига тақдим этилган маълумот учун миннатдорчилик билдирди ва Исроил томони Қозоғистон фуқароларини эвакуация қилиш масаласини ҳал қилиш учун барча саъй-ҳаракатларини амалга оширишини ва бу масалани шахсан назоратга олишини айтди.
