Қозоғистон ва Бошқирдистон ўртасидаги товар айирбошлаш ҳажми 382 миллион долларга етди

ASTANA. Kazinform – ҚР Бош вазири Алихан Смаилов Астана шаҳрида Россия Федерацияси Бошқирдистон Республикаси Бош вазири Андрей Назаров бошчилигидаги Ҳукумат делегацияси билан учрашди. Учрашувда савдо, саноат кооперацияси, қишлоқ хўжалиги, логистика, туризм ва маданият соҳаларидаги ҳамкорликнинг долзарб масалалари муҳокама этилди, деб хабар беради Kazinform Ҳукумат матбуот хизматига таяниб.

2022 йил якунларига кўра, Қозоғистон ва Бошқирдистон ўртасидаги минтақалараро товар айирбошлаш ҳажми тахминан 382 миллион долларни ташкил этиб, маълум ўсишни кўрсатди. Шу билан бирга, товар айирбошлаш ҳажмини янада ошириш, етказиб берилаётган товарлар турларини кенгайтириш имконияти мавжуд.

ҚР Ҳукумати раҳбари саноат кооперацияси соҳасида қўшма лойиҳалар сони ортиб бораётганини таъкидлади. Хусусан, Қостанай вилоятида «Уральский пружинный завод» МЧЖда ишлаб чиқаришни локализациялаш ишлари олиб бориляпти. «Башкирская содовая компания» АЖ билан умумий қиймати қарийб 716 миллион долларлик иккита йирик лойиҳа бўйича ҳамкорлик ўрнатиляпти.

«Қозоғистон Ҳукумати бошқирд тадбиркорларига сармоявий лойиҳаларни амалга оширишда зарур ёрдам кўрсатишга тайёр», – деди Алихан Смаилов.

Ўз навбатида, Андрей Назаров Қозоғистон ва Бошқирдистон вилоятларини турли соҳаларда узоқ муддатли яқин ҳамкорлик боғлаб туришини таъкидлади. Шу билан бирга, уни янада кенгайтириш учун етарли имкониятлар мавжуд.

«Биз Қозоғистонда Бошқирдистон ва бутун мамлакатимиз учун катта имкониятларни кўряпмиз. Шу боис муносабатларимизни янада мустаҳкамлаб, янги йўналиш ва ривожланиш нуқталарини қўшишни истаймиз», – деди Андрей Назаров.