Қозоғистон ва БАА рақамли банкинг соҳасида ҳамкорлик қилади
ASTANA. Kazinform - Қозоғистон Республикаси Миллий банки ва Қозоғистон Республикаси Молия бозорини тартибга солиш ва ривожлантириш агентлиги БАА марказий банки ва молиявий регулятори билан бир қатор учрашувлар ўтказди, дея хабар бермоқда Kazinform Миллий банк матбуот хизматига таяниб.
Амирликларга ташрифдан кўзланган асосий мақсад – БААнинг назорат органлари, банк ташкилотлари ва инвестиция компаниялари билан стратегик ҳамкорликни мустаҳкамлаш, Қозоғистон молия бозорига янги иштирокчилар ва инвестицияларни жалб қилиш, шунингдек, реал секторни кредитлаш, Қозоғистондаги иқтисодиёт, лойиҳалар ва ташаббуслар ҳажмини оширишдан иборат.
Ташриф доирасида БАА Марказий банки раиси Холид Муҳаммад Балама, БАА қимматли қоғозлар ва товарларни тартибга солувчи орган раҳбари Марям Бути Ал Сувайдий, Абу-Даби фонд биржаси раиси Ганнам Бутти Алмазруэи билан учрашувлар бўлиб ўтди.
БАА банклари федерацияси, Абу-Даби тижорат банки, Mubadala инвестиция холдинги ва Абу-Даби инвестиция кенгаши (Abu Dhabi Investment Council) раҳбарияти ҳамда молия секторининг бошқа вакиллари билан бўлиб ўтган учрашувларда банклараро ва сармоявий ҳамкорликнинг долзарб масалалари муҳокама қилинди. Шунингдек, Томас Прамотедам бошчилигидаги БААнинг етакчи сунъий интеллект ва финтех компаниялари Presight ва Core42 вакиллари билан учрашувлар бўлиб ўтди.
– Марказий банк ҳамда Бирлашган Араб Амирликларининг Қимматли қоғозлар ва товарларни тартибга солувчи органи билан учрашувларда макроиқтисодий шароит, молиявий ва сармоявий ҳамкорликнинг ҳолати ва истиқболлари юзасидан фикр алмашилди. Рақамли молиявий активларни тартибга солиш, ислом банкинги ва молия бозорини ривожлантириш бўйича БАА тажрибасини жалб қилиш бўйича келишувларга эришилди. Битимларни амалга ошириш мақсадида янги ҳамкорлик шартномалари имзоланади. Томонлар, шунингдек, Қозоғистон ва БАА молия бозорларига инвестицияларни жалб қилишни рағбатлантиришни давом эттириш, биржа бозорларида ликвидликни ошириш ва Абу-Даби фонд биржаси, KASE ва АХММ ўртасида капитал бозорларини ривожлантириш бўйича тажриба алмашишни давом эттиришга келишиб олдилар. Шунингдек, БАА ва Форс кўрфази мамлакатларидаги инвесторларнинг кенг доираси капиталини Қозоғистон эмитентларининг молиявий воситаларига жалб қилиш мақсадида Қозоғистон биржаларини Tabadul рақамли биржа савдо майдончасига қўшиш имкониятлари муҳокама қилинди, - деб хабар берди Миллий банк матбуот хизмати.
Mubadala давлат холдинг компанияси, Банклар федерацияси ва Абу-Даби тижорат банки билан учрашувларда Қозоғистон томони инвестиция муҳити, бозорга киришдаги тўсиқларни камайтириш чора-тадбирлари, исломий молиялаштириш имкониятларини таъминлаш бўйича меъёрий-ҳуқуқий ҳужжатларга киритилган ўзгартиришлар ҳақида маълумот берди.
Бирлашган Араб Амирликларининг молиявий секторда рақамли банк ва AI технологиялари соҳасидаги етакчи мавқеини инобатга олиб, Қозоғистон молия секторида рақамли ечимлар ва AI технологияларини жорий этиш бўйича қўшма ишлар бўйича аниқ келишувларга эришилди. Бу рақамли молиявий хизматлар самарадорлигини оширади ва молиявий экотизимнинг кибер барқарорлигини оширади.
