Қозоғистон Президенти Petrovietnam директорлар кенгаши раиси Хоанг Куок Вионгни қабул қилди

ASTANA. Kazinform – Қасим-Жомарт Тоқаев Petrovietnam компанияси директорлар кенгаши раиси Хоанг Куок Вионгни қабул қилди, дея хабар беради Kazinform Ақорда матбуот хизматига таяниб.

Учрашувда энергетика ва нефть-газ кимёси соҳаларидаги ҳамкорлик истиқболлари муҳокама этилди.

Давлат раҳбари нефть ва газни қайта ишлаш ва геология-қидирув соҳаларида лойиҳаларни амалга оширишдан манфаатдор бўлган инвесторларга солиқ ва божхона имтиёзларини тақдим этиш имкониятлари мавжудлигини таъкидлади.

Ўз навбатида Хоанг Куок Вионг Қасим-Жомарт Тоқаевга компания томонидан энергетика ва нефть-кимё соҳаларида амалга оширилаётган лойиҳалар ҳақида сўзлаб берди.

Petrovietnam - Жануби-Шарқий Осиёнинг нефть ва газ саноатининг асосий иштирокчиларидан биридир. Унинг активларининг умумий қиймати 40 миллиард долларга баҳоланади.

Эслатиб ўтамиз, Давлат раҳбари Қасим-Жомарт Тоқаев расмий ташриф билан Вьетнамга борди.

Президент бугун Вьетнам раҳбари билан музокаралар ўтказди ва уни давлат ташрифи билан мамлакатга таклиф қилди.

Ушбу ташриф давомида Қозоғистон ва Вьетнам ўртасида 12 та ҳужжат имзоланди.