Қозоғистон мувозанатли кўп векторли ташқи сиёсатни давом эттирмоқда - Маулен Ашимбаев
Сенат Раиси Элчи Дэниел Розенблюмни Қозоғистондаги фаолиятини бошлаши билан табриклади. Шунингдек, Қозоғистоннинг АҚШ билан ҳамкорлиги мамлакат ташқи сиёсатининг, жумладан, парламентлараро алоқаларнинг муҳим йўналишларидан бири эканини таъкидлади.
«Биз парламентлараро мулоқотни мамлакатларимиз ўртасидаги стратегик шерикликнинг ажралмас қисми деб биламиз. Парламент аъзоларимизнинг ташрифлари ўзаро ҳамкорлигимизга ижобий туртки беради»
, — деди Маулен Ашимбаев.
Учрашувда томонлар парламентлараро алоқаларни жонлантириш масаласига эътибор қаратдилар. Сенат Раисининг сўзларига кўра, америкалик конгрессменларнинг Қозоғистонга ташрифи уларга мамлакат ва минтақада бўлаётган воқеалар билан яқиндан танишиш, икки томонлама ҳамкорликни ошириш бўйича аниқ қадамларни белгилаш имконини беради. Бундан ташқари, Маулен Ашимбаев Қозоғистон Президенти Қасим-Жомарт Тоқаев ташаббуси билан мамлакатда амалга оширилаётган кенг кўламли сиёсий ислоҳотлар самаралари ҳақида гапирди.
«Ҳозирда парламент ва маҳаллий ҳокимият вакиллик органлари мустаҳкамланмоқда. Мувозанатли демократик сиёсий тизимни самарали, мустақил ва фаолият юритувчи вакиллик органларисиз амалга ошириш мумкин эмаслигига қатъий ишонамиз. Бугун Сенат фаолиятидаги асосий устувор вазифа Президентимиз томонидан амалга оширилаётган сиёсий ва иқтисодий ислоҳотларни қонунчилик билан таъминлашдан иборат»
, — деди Маулен Ашимбаев.
Ўз навбатида, элчи Қозоғистонда амалга оширилаётган ижтимоий-сиёсий ислоҳотларни юқори баҳолади ва Америка компаниялари қатор йўналишларда қўшма лойиҳаларни амалга оширишдан манфаатдор эканини таъкидлади.
Учрашув якунида Маулен Ашимбаев Парламент Сенати Қозоғистон ва АҚШ ўртасидаги муносабатларни янада мустаҳкамлаш бўйича зарур ишларни давом эттиришини маълум қилди.
Фото: senate.parlam.kz