Қозоғистон мудофаа вазири бошчилигидаги делегация Ўзбекистонга ташриф буюрди

None
Фото: ЎР Мудофаа вазирлиги Ахборот ва оммавий коммуникациялар департаменти
TASHKENT. UzA-Kazinform - Бугун, 18 май куни Ўзбекистон мудофаа вазири генерал-лейтенант Баҳодир Қурбонов расмий ташриф билан келган Қозоғистон мудофаа вазири генерал-полковник Руслан Жақсилиқов бошчилигидаги делегацияни қабул қилди, деб хабар беради Kazinform UzAга таяниб.

Дастлаб меҳмонларни фахрий қоровул иштирокида расмий кутиб олиш тадбири бўлиб ўтди. Ҳарбий оркестр томонидан икки давлат мадҳияси ижро этилди.

Мудофаа вазирлиги Марказий аппаратида ўтказилган икки томонлама ҳамкорлик учрашувида генерал-лейтенант Баҳодир Қурбонов қозоғистонлик ҳамкасбини Ўзбекистонга уюштирган ташрифи билан қутлаб, мустақиллик йилларида икки давлат ўртасида ўрнатилган дўстона ҳарбий муносабатларнинг фақат ижобий томонга силжиб бораётганини таъкидлади.

Шунингдек, Ўзбекистон мудофаа вазири икки томонлама ҳамкорликдаги эришилаётган ютуқларга тўхталар экан, ўзаро яқин дўстона муносабатлар ўзбек-қозоқ алоқаларини янги стратегик шерикчилик босқичига кўтариб, иттифоқчилик муносабатлари мустаҳкамлаётганини қайд этди.

Икки давлат мудофаа вазирлари ҳарбий соҳада эришилган ютуқлар ва келгусида амалга оширилиши режалаштирилаётган масалалар борасида ҳам ҳамкорликни давом эттиришда истиқболли таклифлар билан чиқди.

Учрашувдан сўнг Қозоғистон Республикаси ҳарбий делегацияси Ўзбекистон мудофаа вазири ҳамроҳлигида «Ғалаба боғи»га ташриф буюриб, «Матонат мадҳияси» ёдгорлик мажмуасига гулчамбар қўйди. У ердаги «Шон-шараф» музейи фаолияти билан танишди, дея хабар беради ЎР Мудофаа вазирлиги Ахборот ва оммавий коммуникациялар департаменти.


Сўнгги хабарлар
telegram