Қозоғистон Ироққа мол ва қўй гўшти экспорт қилади

ASTANA. Kazinform - Қишлоқ хўжалиги вазири ўринбосари Ермек Кенжеханули Ироқ Республикасининг Қозоғистон Республикасидаги вакили Жабер Нажма Адбулла Ал-Темимий билан учрашди. Бу ҳақда ҚР Қишлоқ хўжалиги вазирлиги матбуот хизмати маълум қилди.

Вазир ўринбосарининг маълумотларига кўра, 2023 йилда Қозоғистон Республикаси ва Ироқ ўртасида АОК маҳсулотлари айланмаси 1 миллион долларни, 2024 йил январь-июль ойларида эса 672 минг долларни ташкил қилган. 2024 йил январь-июль ойларида Қозоғистон Республикасидан Ироққа экспорт ҳажми 640 минг доллардан ошди. Ироққа асосан пиёз, гуруч, ун, мол гўшти ва майда ҳайвон ёғи экспорт қилинади.

“Қишлоқ хўжалиги соҳасидаги ҳамкорлик катта имкониятларга эга. Икки томонлама муносабатларни мустаҳкамлаш, савдо-сотиқни ривожлантириш, ғалла, гуруч, ун, чорвачилик маҳсулотларини етказиб беришни кўпайтиришга тайёрмиз. Экспорт қилинадиган маҳсулотлар рўйхати кенгайтирилиши, етказиб бериш ҳажми кўпайиши мумкин”, - деди вазир ўринбосари.

Ўз навбатида, Жабер Нажма Адбулла Ал-Темимий бир қатор йўналишларда алоқаларни ривожлантиришни таклиф қилди.

“Мелиорация, агротехника, чорвачилик соҳаларида ижобий тажрибага эга Қозоғистон билан ҳамкорлик қилишдан манфаатдормиз”, – деди у.

Шу муносабат билан Ермек Кенжеханули қишлоқ хўжалиги вазирлиги томонидан йирик ва майда чорва молларини экспорт қилишни кенгайтириш, янги бозорлар очиш борасида амалга оширилаётган чора-тадбирлар ҳақида сўзлаб берди.

Хусусан, маҳаллий қишлоқ хўжалиги маҳсулотлари ишлаб чиқарувчилари Ироққа 30 минг тоннагача Қозоғистон мол ва қўй гўшти етказиб беришга, шунингдек, қорамолларнинг наслчилик ва маҳсулдорлик сифатини яхшилаш учун наслчилик материаллари билан таъминлашга тайёр.

Учрашув якунида томонлар қишлоқ хўжалиги соҳасида ўзаро манфаатли ҳамкорликни янада мустаҳкамлашга келишиб олдилар.