Қозоғистон фуқаролари қайси давлатларга визасиз боришлари мумкин
«Ҳозирда Қозоғистон Республикаси фуқаролари миллий паспорт билан дунёнинг 29 давлатига визасиз боришлари мумкин. Бундан ташқари, бир қатор давлатлар билан дипломатик ва хизмат паспортлари эгаларини визасиз ўзаро озод қилиш бўйича келишувга эришилди», – дейилади Қозоғистон Ташқи ишлар вазирлигининг Kazinform агентлигига берган жавобида.
Қозоғистон фуқаролари Ўзбекистонга ташриф буюриш чоғида ушбу давлат ҳудудида 5 кундан ортиқ, Озарбайжон, Беларусь, Қирғизистон, Тожикистонда эса 30 кундан ортиқ бўлса, ваколатли органларда рўйхатдан ўтишлари шарт.
Бундан ташқари, қозоғистонликлар Гонконг, Эрон, Уммонга 14 кунгача, Барбадосга 28 кунгача, Аргентина, Бразилия, Малайзия, Мальдив Республикаси, Бирлашган Араб Амирликлари, Сербия, Филиппин, Эквадорга 30 кунгача, Албания, Колумбия, Коста-Рика, Молдова, Мўғулистон, Россия, Украинага 90 кунгача, Арманистон, Сент-Винсент ва Гренадинга 180 кунгача, шунингдек, Грузияга 1 йилгача визасиз ташриф буюришлари мумкин.
Қозоғистон фуқаролари Туркияда 90 кунгача визасиз қолишлари мумкин. Кореяга 30 кунгача визасиз ҳам бориш мумкин. Бироқ 2022 йил 1 апрелдан бошлаб фуқаронинг Кореяга киришига рухсат берувчи «К-ЕТА» электрон тизими ишламоқда.
Миср ва Таиланд аэропортга келганда визалар берадиган давлатлар қаторига киради. Таиланд Қозоғистон фуқароларига учиб боргандан кейин 30 кунлик виза беради.
Муаллиф: Руслан Ғаббасов
