Коронавирус аввалгидек хавфли эмаслиги ростми – вазир жавоб беради

NUR-SULTAN. Kazinform – Қозоғистон Соғлиқни сақлаш вазири Ажар Ғиният коронавируснинг ҳозирги штамми мамлакатдаги дастлабки штаммлари каби хавфли эмаслиги ҳақидаги башоратларга ўз фикрини билдирди, деб хабар беради Kazinform.

«Ҳа, шифокорлар, шу жумладан иммунологлар ушбу вирус ва унинг йўналиши ҳақида кўплаб маълумотларни тўплашмоқда. Биз ушбу инфекциянинг тўлқинлар шаклида тарқаладиган циклик хусусиятини пайқаяпмиз. Агар шундай қарайдиган бўлсак, 2020 ва 2021 йилларда бу вақтда касалликнинг тарқалиши кучайган. Вируслар атроф-муҳитнинг таъсири, эмлаш ва касал бўлгандан кейин аҳоли организмида шаклланган иммунитет туфайли ҳам ўзгаришларга учрайди. Яъни, вирус бу омилларга қараб турли кўринишда бўлади, клиник кечиши бошқача бўлади», — деди вазир.

Унинг сўзларига кўра, вируснинг янги штамми пайдо бўладими ёки йўқми, унинг клиник кечиши қандай бўлиши ҳозирча тўлиқ маълум эмас.

«Ҳозирда бутун дунёдаги каби бизда тарқалаётган омикрон штаммининг ВА.5 ва ВА.4 турларининг клиник кечиши қуйидагича: у грипп кўринишидаги ўткир респиратор вирусли инфекцияга ўхшайди, иситмани кўтаради. Ҳозирги тўлқинида дельта вирусида бўлгани каби ўпканинг шикастланиши белгиси йўқ. Беморлар аниқ интоксикация билан тушмоқда. Шунинг учун даволаш ва чеклаш чораларини инфекциянинг ўзгарувчан курсига қараб ўрнатмоқдамиз«, - деди Ажар Ғиният.