Конституция кунида Астанада қандай тадбирлар бўлиб ўтади

ASTANA. Кazinform – Астанада Конституция кунига бағишланган тадбирлар 3 сентябргача давом этади. Бу ҳақда ҳудудий коммуникациялар хизматида бўлиб ўтган матбуот анжуманида маълум қилинди, дея хабар беради Kazinform мухбири.

Конституция кунига бағишланган тадбирларнинг энг йириклари Венгрия, Грузия, Исроил ва Ўзбекистон санъаткорлари иштирокида «The Spirit of Astana» халқаро замонавий этник мусиқа фестивали бўлади. Брифингда мусиқий тадбир 30 август куни соат 12:00 дан 22:00 гача «ЕХРО» кўргазмалар мажмуаси ҳудудида бўлиб ўтиши айтилди.

Шунингдек, 30 август куни соат 14:00 дан 21:00 гача пойтахт аҳолиси ва меҳмонлари Марказий шаҳар боғида ўтказиладиган «Salem fest» расм фестивалида иштирок этишлари мумкин.

Соат 19.00да пойтахтдаги Амфитеатрда Dequine, Moldanazar, Мирас Жугинисов каби таниқли санъаткорларнинг концерти ташкил этилади.

Шу куни соат 12:00 да Озарбайжон Мамбетов номидаги Давлат драма ва комедия театри олдидаги очиқ майдонда концерт бўлиб ўтади. 2 сентябрь куни санъат маркази театр мавсуми Ч. Айтматовнинг «Бўронли бекат» драмаси билан очилади.

1-3 сентабрь кунлари Қўғирчоқ театрида «Алдар кўсе» халқ эртаги асосида саҳналаштирилган спектакль намойиш этилади.

Шунингдек, «Кўктол», «Уркер», «Ўндирис», «Интернационал» аҳоли массивларида «Keruen Fest» байрам дастури ташкил этилади. 30 август куни соат 12:00 да «Кўктол» кичик туманининг «Қўрғалжин» истироҳат боғида бепул байрам концерти ўтказилиши режалаштирилган.

Астана музейлари бирлашган дирекциясида «Мустақиллик устуни – Конституция», «Ядро қуролисиз дунё – Қозоғистоннинг глобал миссияси» маърузалари, шунингдек, «Конституциям – фахрим» кўргазмаси ташкил этилади. Марказлаштирилган кутубхона тизимидаги кутубхоналарда китобхонлар учун маҳорат дарслари, маърифий-кўнгилочар машғулотлар ўтказилади.

«Яқин кунларда пойтахтнинг бешта туманида маҳаллий аҳоли учун «Қувноқ старт» эстафетаси ўтказилади. Есил тумани ташкилотлари эркаклар жамоалари ўртасида футбол бўйича ўртоқлик учрашуви ўтказилиши режалаштирилган», – дейди шаҳар жисмоний тарбия ва спорт бўлими бошлиғи Самат Жилқибаев.

Байрам куни спорт мажмуасида ўғил-қизлар ўртасида эстафета мусобақаси режалаштирилган. «Нура» жисмоний тарбия ва дам олиш мажмуасида 7-сонли болалар ва ўсмирлар спорт мактаби спортчилари ўртасида футбол бўйича байрамона ўртоқлик учрашуви бўлиб ўтади.

Муаллиф: Есимжан Нақтибай