Қизилўрдада Миллий қурултой мажлисини ташкил этиш бўйича ишчи гуруҳ тузилади

QYZYLORDA. Кazinform – Қизилўрда вилояти ҳокими Нурлибек Налибаев Миллий қурултой мажлисини ташкил этиш бўйича ишчи гуруҳ тузилишини маълум қилди.

Эслатиб ўтамиз, Бурабай шаҳрида бўлиб ўтган IV Миллий қурултойда ҚР Президенти Қасим-Жомарт Тоқаев “Бу йил мамлакат пойтахтини Қизилўрдага кўчириш ҳақидаги тарихий қарор қабул қилинганига ва халқимизга “қозоқ” номи қайтарилганига бир аср тўлди. Бундай муҳим воқеалар мамлакат хотирасида сақланиб қолиши керак”, деди ва Миллий қурултойнинг навбатдаги мажлисини қозоқ миллатининг пойтахти бўлган Қизилўрда шаҳрида ўтказишни таклиф қилди.

Вилоят раҳбари бу ташаббус бутун қизилўрдаликларга билдирилган ишонч ва шарафли вазифа эканини таъкидлади.

“Қурултойнинг навбатдаги йиғилишини “Алаш онаси” деб аталган муқаддас маконда ўтказиш тарихий нуқтаи назардан муҳим. Тайёргарликни ҳозирдан бошлаб, қурултойни юқори савияда ташкил этишимиз керак. Вилоят ижтимоий ривожланиш бошқармасига Миллий қурултой мажлисини ташкил этиш бўйича ишчи гуруҳ тузишни топшираман. Ишчи гуруҳ таркибига зиёлилар, фуқаролик жамияти вакиллари, тарихчи олимлар, шунингдек, вилоят ҳокимининг ўринбосарлари, бошқарма ва департамент раҳбарлари киритилиши керак. Гуруҳ ишини мувофиқлаштириш вилоят ҳокимининг ўринбосари Шахмардан Байманов зиммасига юклатилди”, – деди вилоят ҳокими.