Қишлоқ хўжалигини пилот рўйхатга олиш Қозоғистоннинг 54 та аҳоли пунктини қамраб олади
ASTANА. Кazinform - Жорий йилнинг 20 августидан 30 сентябрига қадар Қозоғистонда қишлоқ хўжалигини пилот рўйхатга олиш ўтказилади. Бу муддатда мамлакатнинг ҳар бир вилоятида иккита қишлоқ ва битта шаҳардан жами 54 та аҳоли пункти қамраб олинади.
Рўйхатга олиш Миллий статистика бюросининг ҳудудий бўлинмалари ходимлари томонидан олиб борилади. Унга юридик шахслар, уларнинг таркибий бўлинмалари, якка тартибдаги тадбиркорлар, шу жумладан деҳқон ва фермер хўжаликлари, шунингдек, қишлоқ хўжалиги фаолияти билан шуғулланувчи уй хўжаликлари киради.
“Қишлоқ хўжалигини пилот рўйхатга олиш камчиликларни аниқлайди ва рўйхатга олишнинг асосий жараёнини такомиллаштиришга хизмат қилади. Чунки рўйхатга олиш даврида биз маълумотларни тўплаш усулларини таҳлил қилишимиз, фойдаланилаётган технологиялар самарадорлигини баҳолашимиз, иш жараёнида юзага келиши мумкин бўлган муаммоларни аниқлашимиз мумкин. Бу 2025 йилда асосий қишлоқ хўжалигини рўйхатга олиш даврида усулларни тўғрилаш, кадрлар тайёрлашни яхшилаш ҳамда қишлоқ хўжалиги ҳолатини тўғри ва тўлиқ акс эттириш имконини беради”, — деди ҚР Миллий статистика бюроси раҳбари Мақсат Турлибаев.
Рўйхатга олиш бўйича анкеталарни 20 августдан 30 сентябргача sanaq.gov.kz сайтида тўлдириш мумкин бўлади. Уй хўжаликларига, шунингдек, махсус кийинган (оқ шапка ва гувоҳнома белгиси билан) ва планшетни олиб юрган суҳбатдошлар ташриф буюришади. Респондентлардан қишлоқ хўжалигида фаолият юритаётган иқтисодий фаолият тури, муҳандислик-техник коммуникациялар, мустақил энергия манбалари, қишлоқ хўжалиги инфратузилмаси, меҳнат ресурслари, ишлаб чиқариш бинолари ва объектларнинг мавжудлиги, чорва моллари сони, ер участкалари, органик маҳсулотлар ишлаб чиқаришнинг мавжудлиги каби ва бошқа саволларга жавоб бериш керак бўлади.
Пилот рўйхатга олиш жараёнида 29 минг уй хўлалиги ва 8 минг тадбиркорлик субъекти қамраб олиниши режалаштирилган.
Қишлоқ хўжалигини рўйхатга олиш масалалари бўйича маслаҳат олиш учун 1446 call-марказига ёки Теlegramдаги statgovkz_bot ботига мурожаат қилиш мумкин.
