Қирғизистонда икки ой ичида 8 бола қизамиқдан вафот этди

ASTANА. Кazinform — Қирғизистонда қизамиқдан 8 нафар бола вафот этди. Бу ҳақда Қирғизистон Республикаси Вазирлар кабинети раиси ўринбосари Эдил Байсалов маълум қилди, дея хабар беради Kazinform мухбири.

Расмийга кўра, мамлакатда қизамиқ билан боғлиқ вазият жуда хавфли. Йил бошидан буён 3739 та қизамиқ касаллиги қайд этилган, 8 нафар бола ушбу касалликдан вафот этган.

— Ҳудудда қизамиқнинг катта эпидемияси кузатилмоқда. Мамлакатда жуда хавфли вазият юзага келмоқда. Ўтган йили олтита ўлим ҳолати қайд этилган бўлса, бу йил касаллик январь ва февраль ойларида саккиз нафар боланинг ҳаётига зомин бўлди. Бу қабул қилиб бўлмайдиган ҳолатдир. Ҳар бир туман раҳбари бонг уриб, вазиятни шахсий назоратга олиши керак. Биз универсал эмлаш қамровига эришиш учун чора-тадбирларни кучайтиришимиз лозим. Бу — фарзандларимизнинг ҳаёти ва саломатлиги масаласи, – деди Эдил Байсалов.

Соғлиқни сақлаш вазирлигига эпидемияни тўхтатиш бўйича комплекс чора-тадбирлар режасини ишлаб чиқиш, вазиятни қатъий назорат қилиш, ҳудудларда тезкор чоралар кўриш учун етарли вакцина захирасини таъминлаш топширилди.

Эслатиб ўтамиз, аввалроқ Қирғизистонда қизамиқ билан касалланганлар сони ортгани ҳақида хабар берган эдик.