Қирғизистон давлат идораларига йил охиригача мамлакатдаги барча уйларни суғурта қилиш топширилди
ASTANА. Kazinform - Қирғизистон Вазирлар кабинети раиси Оқилбек Жапаров сув тошқини оқибатларини бартараф этиш бўйича кенгашда тегишли давлат органларига 2024 йил охиригача мамлакатдаги барча уй-жойларни суғурталашни топширди.
Қирғизистон Фавқулодда вазиятлар вазирлиги маълумотларига кўра, 2024 йил сентябрь ҳолатига кўра, мамлакатда 331 та сув тошқини қайд этилган. Сув тошқинларидан 5354 та уйнинг 102 таси шикастланган, 138 таси капитал таъмирга муҳтож.
Оқилбек Жапаров ваколатли давлат органлари олдига 2024 йил охиригача барча уй-жойларни, жумладан, хавфли ҳудудларда жойлашган уйларни суғурта қилиш вазифасини қўйди. Бу фуқароларнинг моддий ҳимоясини таъминлаш, бундай вазият юзага келганда уй-жойидан айрилган оилаларнинг оқибатларини минималлаштириш имконини бериши айтилди. Унинг фикрича, суғурта аҳолининг табиий офатлардан тезроқ тикланишига, давлат бюджети юкини камайтиришга ёрдам берадиган муҳим воситага айланади.
– Глобал исиш туфайли табиий офатлар сони йил сайин ортиб бормоқда. Шу нуқтаи назардан, кўчмас мулкни суғурта қилиш одамлар хавфсизлигини таъминлаш ва табиий офатлар оқибатларига қаршилик кўрсатишнинг зарурий чорасига айланади, - деди у.
Эслатиб ўтамиз, июнь ойи охирида Ўш вилоятининг Ноокат туманида ҳалокатли сув тошқини содир бўлиб, аҳоли ва сайёҳлар ҳалок бўлган эди. Ҳалок бўлганлар орасида қозоғистонлик вояга етмаганлар ҳам бор. Ҳодиса оқибатида 2 та кўприк ва 10 та электр устунларини сув олиб кетган, 30 та уй, ҳовлилар, болалар боғчалари сув остида қолган.
14 июль куни Ўшда ҳалокатли сув тошқини оқибатида бир аёл ва унинг уч қизи ҳалок бўлди.
Август ойида Иссиқкўл вилоятининг айрим ҳудудларида кучли ёмғирдан кейин содир бўлган тошқин оқибатида бир қатор йўлларни сув босган, 497 та уй, 3 та ижтимоий объект ва маданият маркази сув остида қолган эди.
