Келажак учун сармоя: Сенаторлар пенсия активларини бошқариш масалаларини муҳокама қилди

ASTANА. Кazinform – Қозоғистон Республикаси Парламенти Сенатининг Молия ва бюджет қўмитаси депутатлари “Пенсия активларини бошқариш самарадорлиги” мавзусида давра суҳбати ўтказди.

Тадбир давомида жамғариб бориладиган пенсия тизимининг бугунги ҳолати, Ягона жамғариб бориладиган пенсия фондининг инвестиция стратегиясининг самарадорлиги, фуқаролар манфаатларини ҳисобга олган ҳолда пенсия активларини бошқариш механизмларини такомиллаштириш масалалари муҳокама қилинди.

Сенат қўмитаси раиси Султанбек Макежанов ўз нутқида пенсия жамғармаларини самарали инвестициялаш пенсия таъминоти тизими барқарорлигини таъминлашда муҳим омил бўлаётганини таъкидлади.

"Пенсия ёшигача бўлган жамғармалар ўсиши ва шунчаки ҳисобда ётмаслиги учун уларни самарали инвестиция қилиш керак. Пенсия жамғармаларини инвестициялаш самарадорлиги фуқароларнинг пенсия таъминоти даражасига бевосита таъсир қилади. Шунинг учун ҳам бу масала жамият учун доимо долзарб бўлиб қолади”, — деди у.

Муҳокама чоғида депутатлар, давлат органлари вакиллари, экспертлар жамғариб бориладиган пенсия тизимининг макроиқтисодий кўрсаткичлари, пенсия активларининг жорий тақсимланиши, инвестиция самарадорлигини кўриб чиқдилар. Пенсия жамғармалари маблағларидан инфратузилма ва қишлоқ хўжалиги лойиҳаларини молиялаштириш, шунингдек, пенсия жамғармаларининг рентабеллигини ошириш йўлларига алоҳида эътибор қаратилди.

Давра суҳбати иштирокчилари томонидан пенсия активларини бошқариш тизимини такомиллаштиришга қаратилган қатор таклифлар ишлаб чиқилди. Мазкур тавсиялар ҳар томонлама кўриб чиқиш ва амалга ошириш учун тегишли давлат органларига юборилади.

Эслатиб ўтамиз, Сенат раиси Хитойнинг Қозоғистондаги Элчиси билан учрашган эди.