Қасим-Жомарт Тоқаев Давлат байроғини кўтариш маросимида иштирок этди
ASTANA. Kazinform – ҚР Президенти Астанадаги “Атамекен” этно-мемориал мажмуасида Давлат байроғини кўтариш маросимида иштирок этди. Бу ҳақда Ақорда матбуот хизмати хабар берди.
Фахрий қоровул ротаси бошлиғи Давлат раҳбарига тантанага кўрилаётган тайёргарлик ҳақида ҳисобот берди. Кейин Давлат мадҳияси янгради, Давлат байроғи кўтарилди. Қасим-Жомарт Тоқаев йиғилганларни Давлат рамзлари куни билан табриклаб, бу юрт қудратини мустаҳкамловчи тантанали байрам эканлигига эътибор қаратди.
“Ушбу байрам муносабати билан биз ҳозиргина Давлат байроғини кўтардик. Кўк байроғимиз ҳамиша юксакларда ҳилпираб турсин! Байроғимизни тик тутиш ҳар бир фуқаронинг фарзандлик бурчидир. Кўк байроғимиз бизнинг фахримиз. Спортчиларимиз байроғимизни кўп маротаба шоҳсупага кўтаришган. Яқинда жасур қозоқ қизлари Эверестга чиқишди. Байроғимиз яна дунёнинг энг баланд чўққисида ҳилпирайди. Олимпия ўйинлари яқинлашмоқда. Ўйлайманки, муҳтарам халқимиз Парижда байроғимизни баланд кўтаради”, – деди Президент.
Давлат раҳбари кўк байроқ – мустақиллик рамзи, ҳамжиҳатликнинг бошланиши, деб атади.
“Қаҳрамон ота-боболаримиз юрт тақдири гавдаланаётган пайтда байроқ остида бирлашган. Бирликни сақлаб, юртни, заминни ҳимоя қилди. Ерини кўз қорачиғидек асраб, ўз авлодларига омонот қилди. Ўша омонатга содиқ бўлиш авлоднинг буюк мақсадидир”, – деди Қасим-Жомарт Тоқаев.
Президентнинг сўзларига кўра, Қозоғистон тинчликсевар давлат сифатида доимо тинчлик ва тотувликни устувор деб билади ва барча давлатлар билан дўстона муносабатлар ўрнатган.
“Шу туфайли байроғимиз бутун дунёда ҳамжиҳатлик ва тинчлик байроғи сифатида тан олинди. Биз доимо дўстлик тамойилига амал қиламиз. Энди биз ҳаммамиз бир бўлиб, адолатли Қозоғистонни қуряпмиз. Биз ҳаммага тенг имкониятлар берадиган жамият қуришни бошладик. Қисқа вақт ичида биз кенг кўламли сиёсий ислоҳотларни амалга оширдик. Биз янги иқтисодий йўналишимизни белгилаб олдик. Буларнинг барчасини ҳаётга татбиқ этиш ва тўлиқ ўрнатиш осон иш эмас. Барча Қозоғистон халқининг тақдири муштарак, келажаги битта. Шундай экан, бир давлат, бир халқ бўлиб, байроқ остида бирлашсак, албатта мақсадимизга эришамиз”, – деди Қасим-Жомарт Тоқаев.
Президент Давлат рамзлари асосий қадрият ва ғояларни ойдинлаштиради ва ҳар бир инсонда Ватани билан чинакам ғурурланиш туйғусини уйғотади, деди. Шу билан бирга, асосий миллий рамзлар барча фуқароларни оғир дамларда ҳам, ғалабали кунларда ҳам бирлаштириб туришини алоҳида таъкидлади.
