Италиянинг 27 та шаҳрида кучли иссиқ туфайли «қизил» хавф даражаси эълон қилинди
ASTANA. Kazinform —Италияда кучайган жазирама иссиқ сабабли мамлакатнинг барча 27 та йирик шаҳрида энг юқори — «қизил» метеорологик хавф даражаси эълон қилинди, деб хабар беради ANSA агентлиги.
Италия Соғлиқни сақлаш вазирлиги бюллетенига кўра, аввал энг юқори хавф даражаси жорий этилган 25 та шаҳарга яна иккита шаҳар қўшилди. Шу тариқа ҳозирда мамлакатнинг барча йирик шаҳарлари «қизил» ҳудудга киритилди.
Синоптиклар прогнозига кўра, айрим ҳудудларда ҳаво ҳарорати 40 даражагача етади. Жазирама иссиқ тўлқини камида яна бир ҳафта давом этиши кутилмоқда.
Соғлиқни сақлаш вазирлиги «қизил» даража узоқ давом этадиган кучли иссиқ бутун аҳоли саломатлиги учун жиддий хавф туғдиришини англатишини маълум қилди.
Вазирлик изоҳига кўра, бу огоҳлантириш фақат кексалар, болалар ва сурункали касалликка чалинган инсонларга эмас, балки соғлом фуқароларга ҳам тааллуқли.
Италияда жорий йилда жазирама иссиқнинг тўртинчи тўлқини қайд этилмоқда. Бундан аввалги кучли иссиқ даврларида мамлакатда юқори ҳарорат оқибатида инсонлар ҳалок бўлган ҳолатлар ҳам қайд этилган.
Мутахассислар таъкидлашича, юқори ҳарорат кундалик ҳаётга ҳам салбий таъсир кўрсатиб, аҳоли саломатлигига хавф туғдирмоқда ва ҳудудларда ёнғин хавфини кучайтирмоқда.
Эслатиб ўтамиз, яқинда Сеул шаҳрида ҳам кучли иссиқ туфайли илк бор энг юқори хавф даражаси эълон қилинган эди.
