Францияда президентликка номзодлар ўртасида теледебатлар бўлиб ўтади

PARIS. Kazinform – Бугун Францияда Париж вақти билан соат 21:00да президентликка икки номзод: амалдаги президент Эммануел Макрон ва ўта ўнгчи сиёсатчи Марин Ле Пен ўртасида жонли дебатлар бўлиб ўтади, дея хабар беради Kazinform мухбири.

Дебат Елисей саройи учун шиддатли пойгада ҳал қилувчи аҳамиятга эга бўлиши керак, дейди француз мутахассислари.

24 апрел якшанба куни бўлиб ўтадиган сайловнинг иккинчи босқичи арафасида икки номзод ўртасидаги теледуелни миллионлаб французлар телеэкран орқали томоша қилишлари мумкин.

Франция президентлигига номзодлар ўз рақибини эфирда мағлуб этиш учун фақат битта имкониятга эга.

2017 йилги сайловлардаги теледебатларда ҳам француз сиёсатчиси Жан-Марининг қизи М.Ле Пен ва Э.Макрон учрашишган. Ўшанда Марин Ле Пеннинг ўзи баҳсда муваффақиятсизликка учраганини ва Э.Макрон ғалаба қозонганини тан олган эди.

Жорий сайловларнинг биринчи босқичи натижаларига кўра, амалдаги президент ва унинг ўта ўнгчи рақиби энг кўп овоз олган. Э.Макрон ва М.Ле Пен ўртасидаги тафовут Макрон фойдасига тахминан 4-5 фоизни ташкил этган.

Франциялик сиёсатшуносларга кўра, президентлик учун икки номзод ўртасидаги асосий кураш уларнинг иккинчи босқичга ўта олмаган аввалги рақиблари овози учун давом этади. Шунингдек, «Бўйсунмас Франция» сўл партияси раиси Жан-Люк Меленшоннинг электорати ҳам алоҳида қизиқиш уйғотмоқда – 21,95%.

Э.Макрон ва М.Ле Пен учун теледебат ҳал қилувчи бўлиши мумкин, чунки ҳар қандай сиёсий хато қолган даврдаги сайлов кампаниясининг боришига ҳал қилувчи таъсир кўрсатиши мумкин.

Муаллиф: Арнур Рахимбеков