Эквадор президентлигига номзод бошига уч марта ўқ узиб ўлдирилди

QUITO. Кazinform – Эквадор президентлигига номзод, мамлакат Миллий ассамблеяси аъзоси Фернандо Вильявисенсио чоршанба куни мамлакат пойтахти Китода бўлиб ўтган сайловолди йиғилишидан сўнг ўлдирилди. Унинг бошига уч марта ўқ узган, деб хабар беради Кazinform ВВCга таяниб.

Унинг сайловолди гуруҳи аъзоси маҳаллий ОАВга Вильявисенсио машинага ўтираётганида бир киши олдинга чиқиб, унинг бошига ўқ узганини айтди. Унинг ўлимини амалдаги президент Гильермо Лассо ижтимоий тармоқларда тасдиқлади.

Гувоҳларнинг сўзларига кўра, Вильявисенсиога уч марта ўқ узган ва отишмачи воқеа жойидан қочишга муваффақ бўлган.

Эквадорда гиёҳвандлик картелларининг кўпайиши туфайли зўравонлик жиноятларининг ўсиши президентлик кампаниясининг асосий муаммоси бўлди.

Ўтган ой Лассо уюшган жиноятчилик билан боғлиқ бир қатор қотилликлардан сўнг учта вилоятда фавқулодда ҳолат ва тунги комендантлик соати эълон қилди.

Хавфсизликдан ташқари, Вильявисенсио кампанияси коррупцияга қарши курашга қаратилган. Ўтган ҳафтада у ва унинг жамоаси гиёҳванд моддалар савдоси билан боғлиқ бўлган жиноий гуруҳ раҳбари томонидан таҳдид қилинганини айтди.

Унинг ўлдирилиши июлда Манта шаҳри мэри Агустин Интриаго ва февралда Пуэрто-Лопес шаҳри мэри лавозимига номзод Омар Менендеснинг ўлдирилишидан кейин содир бўлди.

Полиция Эквадор президентлигига номзод Фернандо Вильявисенсиони ўлдиришда гумон қилиб, икки кишини ҳибсга олди. Бу ҳақда чоршанба куни Ecuavisa телеканали хабар берди. Унинг сўзларига кўра, сиёсатчини отганлар учта бўлган. Полиция учинчини қидиришда давом этяпти.

Президентлик сайловининг биринчи босқичи 20 августга белгиланган.