Доминикандаги фожиа қурбонлари сони 100 га яқинлашди
ASTANA. Kazinform – Доминикан Республикасида тунги клуб томи қулаб тушди ва 98 киши ҳалок бўлди. Бу ҳақда Listin Diario газетаси хабар берди.
Мамлакат шошилинч тиббий ёрдам маркази директори Хуан Мануэль Мендеснинг сўзларига кўра, ҳодиса оқибатида яна 146 киши тан жароҳати олиб, шифохонага етказилган. Қутқарув ишлари ҳамон давом этмоқда.
Ҳодиса 8 апрель куни эрталаб пойтахт Санто-Домингодаги Jet Set тунги клубида хонанда Руби Перес концерт бераётган вақтда содир бўлган. Хонанда томошабинлар билан бирга қулаган том остида қолиб кетган. У қутқарилди. Ҳозирда Руби Переснинг аҳволи барқарор.
Anadolu агентлиги маълумотларига кўра, ҳалок бўлганлар орасида Бейсбол олий лигасининг (MLB) собиқ спортчиси Октавио Дотель ҳам бор.
Мамлакатда уч кунлик мотам эълон қилинган
Доминикан Республикаси Президенти Луис Абинадер фожиа муносабати билан уч кунлик миллий мотам эълон қилди.
Воқеа жойини кўздан кечирган Абинадер фожиали воқеадан чуқур афсусда эканлигини билдирди.
“Барча қутқарув хизматлари керакли ёрдамни кўрсатди ва қутқарув ишларини олиб бориш учун тинимсиз меҳнат қилмоқда”, – деди президент.
«Jet Set» Доминикан Республикасидаги энг машҳур кўнгилочар масканлардан бири ҳисобланади.
Эслатиб ўтамиз, аввалроқ Доминикан Республикасида концерт вақтида чодир қулаб тушиши оқибатида 80 га яқин одам ҳалок бўлгани ҳақида хабар берган эдик.
