Давлат раҳбари Манғистау вилояти ҳокими Нурлан Ноғаевни қабул қилди

ASTANA. Kazinform – Президентга Манғистау вилоятини ижтимоий-иқтисодий ривожлантиришнинг ўтган 7 ойлик якунлари ва истиқболдаги режалари ҳақида маълумот берилди, деб хабар берди Ақорда матбуот хизмати.

Манғистау вилояти ҳокими Нурлан Ноғаев Давлат раҳбарига ҳисобот даврида вилоятда умумий қиймати 5,3 миллиард тенге бўлган 6 та инвестиция лойиҳаси ишга туширилганини таъкидлади. Умуман олганда, январь-июль ойларида вилоятнинг асосий капиталига йўналтирилган инвестициялар ҳажми 523 миллиард тенгени ташкил этади.

Шунингдек, Давлат раҳбарига ичимлик суви тақчиллигини бартараф этиш борасидаги топшириқнинг бориши ҳақида маълумот берилди. Ушбу муаммони босқичма-босқич ҳал этиш мақсадида вилоятда 2025 йилгача 6 та лойиҳа амалга оширилади. Бунинг натижасида тузсизланган сув ҳажмини 146 минг куб метргача ошириш мумкин бўлади.

Президентга, шунингдек, Ақтау шаҳрининг уй-жой-коммунал хўжалигини яхшилаш ва унинг муҳандислик инфратузилмасини нормаллаштириш, Манғистау атом энергетик комбинатини (МАЭК) капитал таъмирлаш муаммолари ҳақида ҳам маълумот берилди.

Жорий йилда таъмирлаш ишлари учун МАЭКга 9,4 миллиард тенге ажратилди. Улардан 6,8 миллиард тенге МАЭК инвестиция дастурлари доирасида, 2,6 миллиард тенге эса Манғистау вилояти ҳокимлиги захирасидан ажратилган. Бундан ташқари, Президент фармойишига кўра, Ҳукумат захирасидан зарур жиҳозлар харид қилиш учун 4,9 миллиард тенге ажратилди.

Йиғилиш якунида Давлат раҳбари вилоят ҳокимига Манғистау вилояти энергетика тизимининг узлуксиз ишлашини таъминлаш, вилоятни ижтимоий-иқтисодий ривожлантириш комплекс режаси доирасидаги вазифалар ижросини таъминлаш бўйича қатор топшириқлар берди.