Давлат бюджети даромадлари 24 фоизга ошди – Алихан Смаилов

ASTANA. Kazinform - Мамлакатни ижтимоий-иқтисодий ривожлантириш масалаларига бағишланган йиғилишда ҚР Бош вазири Алихан Смаилов сўзга чиқиб, жорий йилда амалга оширилган чора-тадбирлар иқтисодиётнинг барқарор ривожланишини таъминлаш имконини берганини таъкидлади. Январь-март ойларида ялпи ички маҳсулотнинг реал ўсиши 4,9 фоизни ташкил этди, деб хабар беради Kazinform мухбири.

Алихан Смаилов таъкидлаганидек, барча асосий йўналишларда ижобий динамика кузатиляпти: қурилишда - 16 фоизга, савдода - 12 фоизга, транспорт соҳасида - 8 фоизга, ишлаб чиқариш саноатида - 5,4 фоизга ўсиш қайд этилди.

«Уч ой давомида асосий капиталга киритилган инвестициялар ҳажми 16 фоизга, давлат бюджети даромадлари эса 24 фоизга ошди. Бу жорий йилги республика бюджетини аниқлаштиришда ижтимоий тўловлар, соғлиқни сақлаш, таълим, иқтисодиётнинг реал сектори ва инфратузилмани ривожлантиришга қўшимча 2,2 триллион тенге йўналтириш имконини берди», - дея қўшимча қилди Бош вазир Алихан Смаилов.

Эслатиб ўтамиз, аввалроқ Астана шаҳрида Президент Қасим-Жомарт Тоқаев раислигида ижтимоий-иқтисодий ривожланиш масалаларига бағишланган йиғилиш бошлангани ҳақида хабар берилганди.

Муаллиф: Арайлим Мурат