“Чингизхон: мўғуллар дунёни қандай ўзгартирди” кўргазмасига 200 мингдан ортиқ киши ташриф буюрди
ASTANA. Kazinform – Мўғулистон Маданият вазирлиги маданият соҳасини ривожлантириш, кўп томонлама ҳамкорлик қилиш ва Мўғулистон маданий меросини дунёга танитиш мақсадида кўплаб давлатлар билан ҳамкорлик алоқаларини йўлга қўйган. Бу борадаги ишлар доирасида Мўғулистон музейларини ривожлантириш ва хорижий музейлар билан ҳамкорликни йўлга қўйиш, ўзаро тажриба ўрганиш ва қўшма лойиҳаларни амалга оширишга алоҳида эътибор қаратилмоқда, деб ёзади МОНЦАМЭ ахборот агентлиги.
Шу йўналишдаги ишлардан бири айни пайтда Франциянинг Нант шаҳрида ўтказилаётган “Чингизхон: мўғуллар дунёни қандай ўзгартирди” кўргазмаси бўлди. Кўргазмани жорий йилда Мўғулистон ва АҚШда, 2025 йилда эса Швейцарияда тақдим этиш режалаштирилган.
Бугунги кунга қадар кўргазмага 200 мингдан ортиқ киши ташриф буюрди.
Мамлакат маданият вазири Ч.Номин Швейцариянинг Ритберг музейи директори ўринбосари Йоханнес Белц билан учрашиб, ушбу кўргазмани 2025 йилда Швейцарияда давом эттириш ва музейлар соҳасидаги ҳамкорлик масалаларини муҳокама қилди.
Учрашувда қўшма лойиҳаларни амалга ошириш, музей экскурсия гидлари, мураббийлари ва рассомларининг малакасини ошириш бўйича ҳамкорлик масалалари муҳокама қилинди.
Шунингдек, тарихий археологик топилмалар, миллий либослар қўшма кўргазмаларини ташкил этиш ва узоқ муддатли ҳамкорлик масалалари муҳокама қилинди.
Нант шаҳридаги “Чингизхон: мўғуллар дунёни қандай ўзгартирди” кўргазмаси 2024 йил 5 майга қадар давом этади.
