Буюк Британия қирғоқларида нефть ташувчи танкер ва юк кемаси тўқнашиб кетди

ASTANA. Kazinform - Шарқий Йоркшир қирғоқларида, Халл шаҳри яқинида иккита кема тўқнашиб кетди. Улардан бири юк кемаси, иккинчиси нефть ташувчи танкер, дея хабар беради Kazinform BBCга таяниб.

Тўқнашув натижасида иккала кема ҳам ёнган. Одамлар эвакуация қилинган. Лондон вақти билан 13:39 (Астана вақти билан 18:39) ҳолатига кўра, 32 киши қирғоққа олиб чиқилган. Уларнинг аҳволи ҳозирча номаълум.

Британия қирғоқ қўриқлаш хизмати маълумотларига кўра, сигнал маҳаллий вақт билан 9:48 (Астана вақти билан 14:48) да эълон қилинган. BBC манбаларига кўра, нефть танкери ёниб кетган, кейин эса иккинчи кемада ёнғин чиққани ҳақида хабарлар келган.

Тўқнашувда иштирок этган кемалар Американинг Stena Immaculate танкери ва Португалия байроғи остидаги “Солонг” контейнер кемаси бўлиши мумкин.

Денгиз трафигини кузатувчи MarineTraffic веб-сайтига кўра, Грециянинг Агиа Теодори портидан келган Stena Immaculate кемаси соат 09:48 да Халлга лангар ташлади. Шу пайт Шотландиянинг Гренжмут портидан келаётган Солонг унга яқинлашди. Тўқнашув юз берганга ўхшайди.

Воқеа жойига яқин атрофдаги аҳоли пунктларидан қутқарув вертолёти ва қутқарув қайиқлари, шунингдек, қирғоқни қўриқлаш самолёти юборилган. Ёнғин ўчириш ускуналари билан яқин атрофдаги кемалар ёрдамга келди. MarineTraffic веб-сайтига кўра, яқин атрофда яна бир қанча кемалар бор.

Аввалроқ Германияда 300 йўловчиси бўлган тезюрар поезд юк машинаси билан тўқнашиб кетгани ҳақида ёзган эдик.