Алматида Динмухамед Қонаевнинг 111 йиллиги нишонланди
Байрам тадбирида Д.Қонаевнинг издошлари, давлат ва жамоат арбоблари, уруш ва меҳнат фахрийлари, яқинлари, оммавий ахборот воситалари вакиллари, шаҳар аҳолиси ва меҳмонлари иштирок этди.
Д.Қонаев ҳайкали пойига гул қўйишдан сўнг зиёлилар сўзлади.
2022 йил Динмухамед Қонаевга бағишланган йил бўлди. Бу ҳақда Қонаев жамғармаси президенти Элдар Қонаев маълум қилди.
«Ўтган йили халқ таклифи, Президент Қасим-Жомарт Тоқаев фармони билан собиқ Қапшағай шаҳрига Динмухамед Қонаев номи берилди. Бу воқеадан сўнг мамлакатимизнинг кўплаб вилоятларида Қонаевга ҳурмат бажо келтирилди, ҳайкаллар ўрнатилди, буюк зот номи улуғланди. Шундай қилиб, тарихий адолат қарор топди. Бу йилни Д.Қонаев таваллудининг 111 йиллиги билан бошлаяпмиз. Бугун нафақат Алмати, балки мамлакатимизнинг турли ҳудудларида ҳам муҳим воқеа билан боғлиқ тадбирлар бўлиб ўтмоқда. Динмухамед Қонаев номини нафақат уни кўрган, билган замондошларига, балки ёш авлодга ҳам ўрнак қилиш асосий мақсаддир. Чунки бу инсоннинг юртимиз тараққиётига қўшган ҳиссаси беқиёс. Бугунги аёзга қарамай, улуғ зотга ҳурмат бажо келтириш учун келганингиздан жуда миннатдорман, – деди Элдар Қонаев.
Қозоғистон Журналистика академияси вице-президенти Валерий Жандаулетов яқин вақт ичида Динмухамед Қонаевга бағишланган 6 жилдлик китоблар нашр этилишини маълум қилди.
«Биринчи жилди аллақачон нашр этилган. Айтишимиз керакки, бу ерда журналистларнинг меҳнати катта. Яқин кунларда инсон ҳаёти ва ижодига бағишланган 6 жилдлик китоб нашр этилади. Ушбу хайрли тадбирда фаол иштирок этишингизни сўрайман», — деди Валерий Жандаулетов.
Шундан сўнг Туркистон вилоятидан келган ҳурматли оқсоқол Алтинбек Айдарқулов Д.Қонаев руҳига Қуръон тиловат қилди.
Бундан ташқари, тантанали маросимда Қозоғистон Республикаси Миллий хавфсизлик хизмати Чегара хизмати академияси курсантлари «Ўтмишга эҳтиром» акцияси доирасида Д.Қонаев бюстига гуллар қўйиб, оқ каптарлар учирдилар.
Кейинроқ Қонаев музейи ва мемориал квартира-музейидаги экспозицияга экскурсия ташкил этилди.
Эслатиб ўтамиз, 111 йил олдин (1912-1993) атоқли давлат ва жамоат арбоби, уч карра Социалистик Меҳнат Қаҳрамони, Қозоғистон ССР Фанлар академияси академиги, техника фанлари доктори Қонаев Динмухамед Ахметули таваллуд топди.
2022 йилда Қозоғистон Республикаси Президенти Қасим-Жомарт Тоқаевнинг фармони билан Алмати вилояти маркази Қапшағай шаҳрига Қонаев номи берилди.
Муаллиф: Думан Арғингелди
