Алмати шаҳри - Қозоғистон иқтисодиётининг ҳаракатлантирувчи кучи

ALMATY. Кazinform - Йил бошидан бери мегаполис иқтисодиёти тез суръатлар билан ўсиб бормоқда. Йиллик инфляциянинг секинлашуви шароитида қисқа муддатда иқтисодий кўрсаткич 122,2 фоизга, ишбилармонлик фаоллиги индекси эса 58,7 фоизга тезлашди. Савдо, қайта ишлаш саноати, транспорт ва омбор хўжалиги иқтисодий ўсишнинг драйверлари бўлди, деб хабар беради Кazinform мухбири.

Бунгача Қасим-Жомарт Тоқаев шаҳарни ривожлантириш бўйича бир қанча йўналишларда амалга оширилиши лозим бўлган ишларга эътибор қаратган эди.

Давлат раҳбарининг фикрича, биринчи навбатда, шаҳар иқтисодиётини диверсификация қилиш орқали унинг барқарор ривожланишини таъминлаш зарур. Алмати мамлакат иқтисодий ривожланишининг ҳаракатлантирувчи кучи ва етакчиси ҳисобланади. Қозоғистон ялпи ички маҳсулотининг бешдан бир қисми, бюджет даромадининг 25 фоиздан ортиғи ва савдо операцияларининг учдан бир қисми шу шаҳарга тегишли.

Давлат раҳбари топшириғини устувор вазифа сифатида қабул қилиб, давлат ва шаҳар дастурлари доирасида Алматида 3 мингдан ортиқ лойиҳани қўллаб-қувватлаш учун жорий йилда 44 миллиард тенге ажратилди.

Шаҳарда йил бошидан буён ишбилармонлик фаоллиги сезиларли даражада ошди. Жорий йилнинг биринчи чорагида ишбилармонлик фаоллиги индекси (58,7%) бўйича Алмати Қозоғистон вилоятлари орасида биринчи ўринни эгаллади. Қисқа муддатли иқтисодий кўрсаткич 23,9 фоизга ўсди.

Давлат раҳбарининг ваколатларни марказлаштирмаслик бўйича топшириғига мувофиқ, 1 апрелдан бошлаб шаҳар ҳокимлигининг 15 та функцияси туман ҳокимликларига ўтказилди ва уларнинг бюджети 2,7 баробарга, яъни 161,6 миллиард тенгега оширилди.

Ҳисобот даврида асосий капиталга 484 млрд тенге жалб этилди. Шу билан бирга, хусусий инвестициялар 2,7 фоизга ошди.

Муаллиф: Алма Муқанова