2027-2028 йилларда Қозоғистонда инфляция 5 фоизга камаяди - ХВЖ
ASTANA. Кazinform - Халқаро Валюта Жамғармасининг Қозоғистон Республикасига миссияси якунлари бўйича якуний баёноти эълон қилинди. Бу ҳақда ҚР Миллий банки матбуот хизмати хабар беради.
18 сентябрдан 1 октябргача Қозоғистон ХВЖ миссиясини қабул қилди. Ташриф якунлари бўйича жорий макроиқтисодий ҳолат ва таркибий ўзгаришлар, пул-кредит ва солиқ-бюджет сиёсати, шунингдек, асосий хулоса ва тавсиялар ҳақида умумий маълумотни ўз ичига олган якуний баёнот эълон қилинди.
Миссия маълумотларига кўра, Қозоғистон иқтисодиёти барқарор, инфляция аста-секин пасаймоқда, кредитлашнинг юқори ўсиш суръатларига қарамай, банк тизими умуман барқарор.
2025 йилда иқтисодиётни қўллаб-қувватлаш ва Тенгиз нефт конини кенгайтириш учун бюджет харажатлари доирасида иқтисодий ўсиш суръатлари тезлашиши кутилмоқда. Хавф омиллари сифатида Қозоғистон билан савдо қилувчи мамлакатлар иқтисодиётининг мумкин бўлган секинлашиши, геосиёсий вазиятнинг потенциал кескинлашиши, шунингдек, хомашё нархларининг ўзгариши қайд этилди.
“ХВЖ экспертлари 2024 йил август ойида инфляция пасайганини қайд этиб, 2024 йил охирига бориб 8,3 фоизга, 2027-2028 йилларда эса 5 фоизга тушишини башорат қилмоқда. Валюта курсининг мослашувчанлиги доирасида, пул-кредит сиёсати самарадорлигини ошириш, шунингдек, Қозоғистон Миллий банкининг 2023 йил февралидан бошлаб ички нархларни барқарорлаштирган базавий ставкани пасайтириш бўйича жиддий позицияси қулай омиллар сифатида қайд этилди”, — дейилади банк хабарида.
Миссия молия секторида барқарорликни ошириш чора-тадбирларини ижобий баҳолади. Шу билан бирга, ХВЖ Қозоғистон Республикаси бюджетининг Миллий жамғарма ресурсларига ҳаддан ташқари боғлиқлигидан хавотирда. Мутахассислар фискал консолидация, шаффофлик ва бюджет тамойиллари асосида фискал тизим асосларини мустаҳкамлаш муҳимлигига эътибор қаратмоқда. Бундан ташқари, Миссия Қозоғистон Республикаси Президентининг “Иқтисодиётни либераллаштириш чора-тадбирлари тўғрисида”ги фармонида кўзда тутилган таркибий ўзгаришларни амалга ошириш муҳимлигини ҳам таъкидлади.
IV модда бўйича ХВЖ миссиясининг навбатдаги ташрифи 2025 йилнинг май ойида бўлиб ўтади.
