2024 йилги Паралимпия ўйинлари: Қозоғистон жамоасининг асосий умидлари
ASTANA. Kazinform - Қозоғистонлик паралимпиячилар 28 августдан 8 сентябргача Парижда бўлиб ўтадиган Ёзги Паралимпия ўйинларида иштирок этади. Бунгача спортчилар мамлакатга бир неча медаль олиб келган. Олдинги ўйинлардаги ютуқлар ва медаллар учун имкониятлар ҳақида Kazinform агентлиги материалида ўқинг.
Ёзги Паралимпия ўйинларидаги ютуқлар
1996 йилдан бери қозоғистонлик спортчилар ёзги Паралимпия ўйинларида пара сузиш, пара пауэрлифтинг ва пара дзюдо каби йўналишларда 7 та медаль (2 та олтин, 4 та кумуш ва 1 та бронза) қўлга киритди.
2016 йилда Риода Зульфия Ғабидуллина пара сузиш бўйича олтин, Раушан Қўйшибаева пара пауэрлифтинг бўйича кумуш медални қўлга киритган эди.
2020 йилда Токиода Қозоғистон терма жамоаси 1 та олтин, 3 та кумуш ва 1 та бронза медалини қўлга киритди. Токио олтинини мамлакатга пара пауэрлифтинг бўйича Давид Дегтярев олиб келди, пара дзюдочилар Даулет Темиржан, Зарина Байбатина ва Ануар Сариев учта кумуш медални, пара сузиш бўйича эса бронза медалини Нурдаулет Жумағали қўлга киритди. Шу тариқа, Токиодаги Паралимпия ўйинларининг медаллар жамғармасида Қозоғистон 5 та медални қўлга киритиб, 51-ўринни эгаллади.
Қозоғистонлик паралимпиячилар Парижда
2024 йилда Парижда бўлиб ўтадиган Паралимпия ўйинларида 44 нафар спортчи спортнинг 9 тури бўйича, жумладан, пара сузиш, пара пауэрлифтинг, пара атлетика, пара каноэ, пара таэквондо, пара волейбол (ўтирган ҳолда ўйналадиган волейбол), пара ўқ отиш, пара стол тенниси, пара дзюдо бўйича баҳслашади.
Бундан ташқари, Париждаги мусобақада Паралимпия ўйинлари чемпионлари Зульфия Ғабидуллина ва Давид Дегтярев, Паралимпия ўйинлари совриндорлари Раушан Қўйшибаева (кумуш) ва Нурдаулет Жумағали (бронза) ҳам иштирок этади.
Энг кўп лицензияни пара дзюдочилар қўлга киритди - 10 киши.
Делегациялар ва иштирокчиларнинг рекорд сони
Париж-2024 Паралимпия ўйинларида рекорд миқдордаги делегациялар ва аёллар иштирок этади, деб хабар қилди Халқаро Паралимпия қўмитаси (ХПҚ). Жамоаларнинг келиши давом этаётгани сабабли якуний рақамлар ҳали аниқланаётган бўлса-да, рекорд даражадаги 168 делегациядан тахминан 4400 нафар спортчи иштирок этиши кутилмоқда.
Делегациялар сони Лондон-2012 ва Токио-2020 Паралимпия ўйинларида ўрнатилган аввалги рекорддан – 164 нафардан ошиб кетади.
1983 нафар аёл спортнинг 22 тури бўйича 549 та медаль учун кураш олиб боради.
Аввал айтиб ўтганимиздек, Қозоғистондан 44 нафар спортчи иштирок этмоқда, бу ҳам рекорд кўрсаткичдир.
2024 йилги Паралимпия ўйинларига бешта энг йирик делегация
2004 йилдан бери Афинадаги барча Паралимпия ўйинларида медаллар сони бўйича етакчилик қилаётган Хитой 282 нафар спортчидан иборат энг катта делегацияга эга.
Бразилия 255 нафар спортчи билан иккинчи йирик делегацияга эга, мезбон Франция эса 237 нафар спортчи билан иштирок этади.
АҚШдан 220 нафар спортчи, Буюк Британиядан эса 201 нафар спортчи иштирок этади.
Эслтиб ўтамиз, аввалроқ ҚР Бош вазири Олжас Бектенов икки байроқдор – Осиё Паралимпия ўйинлари ғолиби, Қозоғистон чемпионатининг ўн карра ғолиби Берик Измағанбетов (ўтирган ҳолда ўйналадиган волейбол) ва Қозоғистон чемпионати совриндори Севда Алиевага (пара ўқ отиш) давлат байроғини топширган эди.
Шунингдек, XVII ёзги Паралимпия ўйинларида иштирок этаётган қозоғистонлик паралимпиячиларнинг биринчи оқими Парижга жўнаб кетди.
Бугун, 28 август куни Паралимпия ўйинларининг тантанали очилиш маросими бўлиб ўтади.
Мусобақа саналари:
- 29, 30, 31 август — пара таэквондо
- 29, 31 август, 2, 5, 6 сентябрь - ўтирган ҳолда ўйналадиган волейбол
- 30, 31 август, 4, 5 сентябрь — пара енгил атлетика
- 31 август, 1, 4 сентябрь – пара ўқ отиш
- 1, 3, 4, 5, 6 сентябрь - пара сузиш
- 1, 2, 4, 6, 7 сентябрь - пара стол тенниси
- 5, 7 сентябрь - пара пауэрлифтинг
- 5, 6, 7 сентябрь – пара дзюдо
- 6, 7 сентябрь - пара каноэ
