Корея божхона хизмати маълумотларига кўра, январь ва июнь ойлари оралиғида чет элдан дори воситаларини тўғридан-тўғри сотиб олиш ва уларни мамлакатга ноқонуний олиб киришнинг 4155 та ҳолати аниқланган. 2025 йилда бундай 1189 та ҳолат қайд этилган.
Бундан ташқари, жорий йилнинг дастлабки олти ойида 391 та Wegovy ва Mounjaro дори қутиси божхонадан қонуний равишда ўтказилди. Ўтган йили бу кўрсаткич 191 та қутини ташкил этган эди.
Ноқонуний жўнатмаларнинг аксарияти почта орқали амалга оширилган. Бу хорижий онлайн-дўконлардан озишга қарши дориларни сотиб олувчилар ва уларни халқаро почта орқали буюртма қилувчилар сонининг кўпайиши билан боғлиқ.
Жорий йилнинг биринчи ярмида божхона хизмати Wegovy ва Mounjaro препаратларини ўз ичига олган 3489 та ноқонуний почта жўнатмаларини аниқлади. Бу 2025 йилга нисбатан уч баравар кўп, ўшанда 1046 та ҳолат қайд этилган эди.
Бундан ташқари, йўловчилар томонидан препаратларни шахсий ташишнинг 656 та ҳолати қайд этилган. Ўтган йили бундай 134 та ҳолат аниқланган. Wegovy ва Mounjaro препаратларини йўловчиларнинг қўл юкларида мамлакатга олиб кириш тақиқланган.
– Wegovy ва Mounjaro препаратларини рухсатсиз олиб кириш Божхона тўғрисидаги қонунни қўпол равишда бузиш ҳисобланади ва қонун билан жазоланади. Биз хавфли фармацевтика маҳсулотларини чегарадан ноқонуний олиб ўтишнинг олдини оламиз, — деди божхона хизмати вакили.
Эслатиб ўтамиз, Ҳиндистон кимётерапия ўрнини босиши мумкин бўлган саратонга қарши дори ишлаб чиқарди.