Жанубий Кореяда бу йилги энг кучли зилзила қайд этилди

ASTANA. Kazinform – 17 ноябрда Жанубий Кореянинг жануби-шарқий қисмида магнитудаси 3,6 балл бўлган зилзила содир бўлди. Бу - йил бошидан бери мамлакатда қайд этилган энг кучли зилзила ҳисобланади, деб хабар беради Yonhap агентлиги.

Фото: Pixabay

Корея метеорология бошқармаси маълумотларига кўра, ер ости силкинишлари маҳаллий вақт билан соат 23:10 атрофида Шимолий Кёнсан вилоятида содир бўлган.

Зилзила эпицентри Санжу шаҳри марказидан шимоли-ғарбга қараб тахминан 22 километр масофада жойлашган. Зилзила ўчоғи 20 километр чуқурликда қайд этилган.

Дастлаб сейсмологлар зилзила магнитудасини 3,7 деб баҳолаган. Бироқ қўшимча таҳлиллардан сўнг бу кўрсаткич 3,6 гача пасайтирилган.

Бу - йил бошидан бери Корея яримороли ва унга туташ сув ҳудудларида қайд этилган 58 та зилзила орасида энг кучлиси ҳисобланади.

Минтақада магнитудаси 3,5 дан юқори бўлган сўнгги зилзила тахминан бир ярим йил аввал, ўтган йил 5 майда содир бўлган. Шунда Жанубий Чхунчхон вилоятидаги Тэан шаҳрининг шимоли-ғарбий қисмида, 52 километр масофада денгизда магнитудаси 3,7 бўлган ер ости силкинишлари қайд этилган.

Жабрланганлар ва вайрон бўлган объектлар ҳақида маълумот берилмаган.