Brent маркали нефть фьючерсларининг октябрь ойида етказиб бериш шартномалари 25 центга ошиб, бир баррели 91,87 долларни ташкил этди. АҚШнинг WTI маркали нефть фьючерсларининг сентябрь ойида етказиб бериш шартномалари 2 центга арзонлаб, бир баррели 85,81 доллардан сотилди. Шу билан бирга, фаолроқ савдо қилинаётган WTIнинг октябрь ойидаги шартномаси 14 центга ошиб, 84,53 долларга етди.
Brent бир кун аввалги савдоларни бир баррели 91,62 доллар даражасида якунлади, нарх 0,7 фоизга ошди. WTI эса 1,1 фоизга қимматлаб, 85,83 доллардан савдоланди. Ҳар икки эталон нефть нави 24 июлдан бери энг юқори кўрсаткичга етди.
Бозор иштирокчилари Ҳормуз бўғози атрофидаги вазият ва Яқин Шарқдан нефть етказиб беришга таҳдид солиши мумкин бўлган хавфларни баҳоламоқда. БАА ва Эрон ўртасидаги кескинликнинг кучайиши ҳам қўшимча эътиборни тортяпти.
Айни пайтда АҚШдаги нефть захиралари ҳақидаги маълумотлар нархларнинг янада ўсишини чеклаяпти. АҚШ Энергетика ахборот бошқармаси маълумотларига кўра, ўтган ҳафтада мамлакатдаги тижорий хом нефть захиралари кутилмаганда 4,4 миллион баррелга ошган.