Ҳужжатга мувофиқ, янги объектларни жойлаштиришда йўлларнинг бандлик даражаси, транспорт оқими ва ҳайдовчиларнинг эҳтиёжлари ҳисобга олинади.
Шунингдек, муҳандислик коммуникацияларининг мавжудлиги ва атрофдаги ҳудудларни ривожлантириш истиқболлари ҳам инобатга олинади.
Ўзгаришларнинг зарурати мамлакатда йўл бўйи сервис инфратузилмаси бир текис ривожланмаётгани билан изоҳланади. Асосий масалалар қаторига айрим йўл участкаларида инфратузилманинг етишмаслиги, қурилиш учун ер майдонларининг етарлича тайёрланмагани, ер олишдаги қийинчиликлар ҳамда баъзи ҳудудларнинг инвестициявий жозибадорлиги пастлиги киради.
Янги сервис хабларида қуйидаги объектлар ташкил этилиши кўзда тутилган:
- автомобиль ва газ тўлдириш шохобчалари;
- электромобилларни қувватлаш станциялари;
- овқатланиш масканлари;
- меҳмонхоналар ва мотеллар;
- санитария мажмуалари;
- техник хизмат кўрсатиш станциялари;
- автомобиль ювиш шохобчалари;
- дўконлар;
- автотураргоҳлар;
- дам олиш майдончалари.
Объектлар сони ва уларнинг турлари транспорт ҳаракати жадаллигига қараб белгиланади. Транспорт оқими ва йўл ҳаракати иштирокчиларининг эҳтиёжлари ўзгаришига қараб, хабларни жойлаштириш схемаси ҳам қайта кўриб чиқилади. Агар ўзгаришлар танлов натижаларига кўра ер майдонларини олган инвесторларнинг манфаатларига дахл қилса, улар билан келишиш талаб этилади.
Бундан ташқари, режада йўл бўйи сервис объектларининг ягона рақамли реестрини, уларнинг жойлашув харитасини, мониторинг тизимини ва фойдаланувчилар учун онлайн хизматни яратиш ҳам назарда тутилган.
Кутилишича, янги чоралар автомобиль йўлларида хизмат кўрсатиш сифатини яхшилаш, Қозоғистоннинг туристик ва транзит жозибадорлигини ошириш ҳамда йўл бўйи инфратузилмасига хусусий инвестицияларни жалб этиш имконини беради.
Транспорт вазирлиги маълумотларига кўра, республика аҳамиятига эга бўлган 25 минг километр автомобиль йўллари бўйлаб йўл бўйи сервисининг 1 428 та объекти жойлашган. Уларнинг 1 329 таси ёки 93 фоизи миллий стандарт талабларига жавоб беради.
Буйруқ 2026 йил 20 октябрдан кучга кирди.