Япония вакили илк бор ФИФА президентлигига номзодини илгари сурдис

ASTANA. Kazinform — Япония футбол ассоциациясининг собиқ президенти Кодзо Ташима ФИФА президенти лавозимига ўз номзодини расман илгари сурди. Унинг номзодини бешта миллий футбол федерацияси қўллаб-қувватлаган. Бу ҳақда Informsports.kz хабар берди.

Фото: Instagram_Kozo tashima

68 ёшли Кодзо Ташима ҳозирда Япония футбол ассоциациясининг фахрий президенти, шунингдек, 2015 йилдан буён ФИФА кенгаши аъзоси ҳисобланади. У ташкилот президенти лавозимига номзод сифатида рўйхатдан ўтиш ниятини билдирган илк япониялик вакил бўлди.

ФИФА президенти лавозимига номзод бўлиш учун камида бешта миллий футбол ассоциациясининг қўллаб-қувватлаши талаб этилади. Ташима ушбу талабни бажарган бўлса-да, энди унинг номзоди белгиланган талабларга мувофиқлиги ва ҳалоллиги нуқтаи назаридан текширувдан ўтиши керак.

Айни пайтда президентлик сайловида иштирок этиш ниятини билдирган яна уч нафар номзод бор. Улар — ФИФАнинг амалдаги президенти Жанни Инфантино,

Швейцария терма жамоасининг собиқ сардори Рамон Вега ва Франция футбол федерацияси раҳбари Филипп Диалло.

Жанни Инфантино 2016 йилдан буён ФИФАга раҳбарлик қилиб келмоқда. У бўлажак сайловда яна бир муддатга президент бўлишни мақсад қилган. Аввалроқ унинг рақиблари ташкилот раҳбариятини бошқариш тизими ва шаффофлик масалалари юзасидан танқид қилган эди. Кодзо Ташима ҳам ўз сайловолди дастуридаги асосий устувор йўналишлардан бири сифатида бошқарув сифатини яхшилаш ва шаффофликни оширишни белгилади.

ФИФА президенти сайлови 2027 йил 18 мартда Работ шаҳрида бўлиб ўтадиган ташкилотнинг 77-конгресси доирасида ташкил этилади. Сайловда ФИФАга аъзо бўлган барча 211 та миллий футбол ассоциацияси иштирок этиши ва овоз бериши мумкин.